કેનેડાના હેલિફેક્સ પ્રાંતમાં આવેલા વોલમાર્ટ સ્ટોરમાં કામ કરતી ૧૯ વર્ષની ગુરસિમરન કૌર નામની યુવતી સ્ટોરના ઓવનમાં જીવતી ભૂંજાઈ ગઈ હતી

Canada, તા.૧

કેનેડામાં ભારતીય યુવતીના અપમૃત્યુની એક અત્યંત આઘાતજનક ઘટના સામે આવી છે. કેનેડાના હેલિફેક્સ પ્રાંતમાં આવેલા વોલમાર્ટ સ્ટોરમાં કામ કરતી ૧૯ વર્ષની ગુરસિમરન કૌર નામની યુવતી સ્ટોરના ઓવનમાં જીવતી ભૂંજાઈ ગઈ હતી. ચોંકાવનારી બાબત એ છે કે ગુરસિમરન ઓવનરૂમમાં હોવાની જાણ સ્ટોરના કોઈ કર્મચારીને નહોતી. ઘટનાની વિગતો પ્રમાણે મૂળ પંજાબના લુધિયાણના વતની ગુરસિમરન અને તેની માતા ત્રણ વર્ષ અગાઉ સારા ભવિષ્યની આશામાં બ્રિટનથી કેનેડા જઈ વસ્યાં હતાં. બંને જણાં અહીંના હેલિફેક્સમાં આવેલા વોલમાર્ટમાં નોકરી કરતાં હતાં. ગુરસિમરનના પિતા અને ભાઈ લુધિયાણામાં જ રહે છે. મળતી વિગતો અનુસાર, ગત શનિવારે ગુરસિમરન મોડાં સુધી ઘરે નહીં આવતાં તેની માતા તેને શોધવા માટે વોલમાર્ટ પહોંચી હતી. ત્યાં જઈ તેણે હાજર કર્મચારીઓને ગુરસિમરન અંગે પૂછતાં કોઈકે કહ્યું કે તે સ્ટોરમાં જ કોઈની સાથે કામ કરતી હશે અથવા તો કોઈ ગ્રાહકને મદદ કરતી હશે. થોડી શોધખોળ પછી પણ તેમને સ્ટોરમાં ક્યાંય ગુરસિમરન જોવા ના મળતાં તેમણે સ્ટોરમાં અન્ય જગ્યાઓએ તેને શોધવા પ્રયાસ કર્યો હતો. તેનો ફોન પણ લાગતો નહોતો. તેવામાં કોઈએ તેમને કહ્યું કે ઓવનમાંથી કંઈ લીક થતું હોય તેમ લાગે છે. આથી તેઓ સ્ટોરના ઓવન રૂમ સુધી પહોંચ્યાં હતાં. જ્યાં તેમને કંઈક વિચિત્ર બળવાની વાસ આવતાં તેમણે ઓવનરૂમનો દરવાજો ખોલ્યો હતો. દરવાજો ખોલતાં જ તેમને ધ્રાસ્કો પડ્યો હતો. તેમની સામે જ તેમની દીકરી અર્ધબળેલી હાલતમાં પડેલી હતી. ઘટનાની જાણ થતાં જ પોલીસ સ્ટોર પર પહોંચી શબને પોસ્ટમોર્ટમ માટે મોકલી આપ્યું હતું. હેલિફેક્સ પોલીસે ગુરસિમરનના મૃત્યુની પુષ્ટિ કરી લોકોને સોશિયલ મીડિયા પર અફવાઓ નહીં ફેલાવવાની અપીલ કરી છે.