Nagpur,તા.૭

 ભારતીય ટીમે નાગપુરના વિદર્ભ ક્રિકેટ એસોસિએશન સ્ટેડિયમ ખાતે રમાયેલી પહેલી મેચ ૪ વિકેટથી જીતીને ઇંગ્લેન્ડ સામેની ત્રણ મેચની વનડે શ્રેણીની શાનદાર શરૂઆત કરી. આ મેચમાં ટીમ ઈન્ડિયાને ૨૪૯ રનનો લક્ષ્યાંક મળ્યો હતો, જે તેમણે ૩૮.૪ ઓવરમાં ૬ વિકેટ ગુમાવીને પ્રાપ્ત કર્યો હતો. ભારતીય ટીમની આ જીતમાં ઉપ-કપ્તાન શુભમન ગિલે બેટિંગમાં મહત્વપૂર્ણ ભૂમિકા ભજવી હતી અને ૯૬ બોલમાં ૮૭ રનની શાનદાર ઇનિંગ રમી હતી. ગિલે આ ઇનિંગ સાથે એક મહાન સિદ્ધિ હાંસલ કરી અને પાકિસ્તાન ટીમના ઓપનિંગ બેટ્‌સમેન ઇમામ ઉલ હકને એક ખાસ યાદીમાં પાછળ છોડી દીધો.

શુભમન ગિલનો ઓસ્ટ્રેલિયાનો ટેસ્ટ પ્રવાસ અપેક્ષા મુજબ બિલકુલ નહોતો, પરંતુ તે તેના મનપસંદ ફોર્મેટ,વનડેમાં એ જ જૂની શૈલીમાં પાછો ફર્યો છે. ચેમ્પિયન્સ ટ્રોફી ૨૦૨૫ પહેલા રમાઈ રહેલી આ વનડે શ્રેણીમાં, ગિલે પહેલી જ મેચમાં પોતાની ઇનિંગ્સના આધારે ટીમ મેનેજમેન્ટને ઘણી રાહત આપી છે. ગિલે ૮૭ રનની પોતાની ઇનિંગ દરમિયાન કુલ ૧૪ ચોગ્ગા ફટકાર્યા હતા અને આ સાથે તે હવે વનડે ફોર્મેટમાં કારકિર્દીની પ્રથમ ૪૮ મેચમાં સૌથી વધુ રન બનાવનાર ત્રીજો ખેલાડી બની ગયો છે. ગિલે આ મામલે પાકિસ્તાની ખેલાડી ઇમામ ઉલ હકને પાછળ છોડી દીધો છે. ગિલના નામે હવે ૪૮ વનડે મેચોમાં કુલ ૨૪૧૫ રન છે.

કારકિર્દીની પહેલી ૪૮ વનડેમાં સૌથી વધુ રન બનાવનારા ખેલાડીઓ

હાશિમ અમલા (દક્ષિણ આફ્રિકા) – ૨૬૨૭ રન

એબી ડી વિલિયર્સ (દક્ષિણ આફ્રિકા) – ૨૫૫૧ રન

શુભમન ગિલ (ભારત) – ૨૪૧૫ રન

ઇમામ ઉલ હક (પાકિસ્તાન) – ૨૨૩૨ રન

ગૌતમ ગંભીર (ભારત) – ૨૦૬૭ રન

આ બાબતમાં ગિલ કોહલીથી આગળ છે.

વનડે  ફોર્મેટમાં, શુભમન ગિલ હવે ૨૦૦૦ કે તેથી વધુ રન બનાવવા ઉપરાંત સૌથી વધુ સરેરાશ સાથે બેટિંગના સંદર્ભમાં વિરાટ કોહલી અને એબી ડી વિલિયર્સથી આગળ છે. ગિલે અત્યાર સુધીમાં ૪૮ વનડેમાં ૫૮.૯૦ ની સરેરાશથી ૨૪૧૫ રન બનાવ્યા છે, જ્યારે વિરાટ કોહલીની હાલની વનડે બેટિંગ સરેરાશ ૫૮.૧૮ છે. ગિલ હાલમાં આ યાદીમાં ટોચ પર છે. ઇંગ્લેન્ડ સામેની પહેલી વનડે શરૂ થયા પહેલા ગિલની સરેરાશ ૫૮.૨૦ હતી, જેમાં હવે તેણે વધુ સુધારો કર્યો છે.