દરમિયાન માલિબુ અને પેસિફિક પેલિસાડેસ જેવા ઊંચું મૂલ્ય ધરાવતા વિસ્તારોમાં વિનાશથી નુકસાનનો આંકડો વધવાની આશંકા છે
Los Angeles તા.૧૧
અમેરિકાના લોસ એન્જેલસના જંગલોની ભીષણ આગને પગલે પારાવાર નુકસાન થયું છે. વિવિધ વિસ્તારોમાં લાગેલી આગ અમેરિકાના અત્યાર સુધીના ઇતિહાસમાં સૌથી મોટી છે. આ આગમાં મૃત્યુઆંક વધીને ૧૦ને પાર કરી ગયો છે. આર્થિકરીતે નુકસાનનો અંદાજ ૧૦૦ અબજ ડોલરને પાર કરી ગયાનું જણાવામાં આવી રહ્યું છે.‘પેલિસાડેસ ફાયર’ને કારણે ૧૯,૯૭૮ એકરની જમીન પર વિનાશ વેરાયો હતો. ગુરુવાર રાત સુધીમાં માત્ર છ ટકા વિસ્તારમાં આગને કાબૂમાં લઇ શકાઈ હતી. જ્યારે ‘ઇટોન ફાયર’ને લીધે ૧૩,૬૯૦ એકરની જમીન હોમાઇ ગઈ હતી અને આગ પર સહેજ પણ નિયંત્રણ મેળવી શકાયું ન હતું. દરમિયાન આગને કારણે મનોરંજન ઉદ્યોગને ગંભીર નુકસાન થયું છે. ડિઝની અને યુનિવર્સલ જેવા સ્ટુડિયોમાં શૂટિંગ અટકાવી દેવાયું હતું. વિવિધ ફિલ્મોના પ્રીમિયર શો રદ કરાયા હતા અને ઓફિસો બંધ કરવાની ફરજ પડી હતી. જેપી મોર્ગનના અંદાજ પ્રમાણે વીમો ધરાવતી પ્રોપર્ટીનું નુકસાન ૨૦ અબજ ડોલરને વટાવી શકે, જે લોસ એન્જેલસની આગને ‘કેમ્પ ફાયર’ કરતાં વધુ વિનાશક પુરવાર કરે છે. ‘કેમ્પ ફાયર’માં વીમો ધરાવતી પ્રોપર્ટીનું નુકસાન ૧૦ અબજ ડોલર થયું હતું. દરમિયાન માલિબુ અને પેસિફિક પેલિસાડેસ જેવા ઊંચું મૂલ્ય ધરાવતા વિસ્તારોમાં વિનાશથી નુકસાનનો આંકડો વધવાની આશંકા છે. ઉપરાંત, આગમાં ખતમ થયેલી ઘણી પ્રોપર્ટીનો વીમો નથી.નિષ્ણાતોના જણાવ્યા અનુસાર તાજેતરની આગ ‘ક્લાઇમેટ ચેન્જ’ના વધતા જોખમો તરફ ઇશારો કરે છે. જેની કેલિફોર્નિયાના અર્થતંત્ર અને ઇન્શ્યોરન્સ માર્કેટ પર નોંધપાત્ર અસર થવાની શક્યતા છે. જોકે, પારાવાર નુકસાન છતાં રહેવાસીઓ અને નેતાઓએ પુનઃ નિર્માણનો દ્રઢ વિશ્વાસ વ્યક્ત કર્યો છે. ફાયરબ્રિગેડ આગને ઓલવવાનો સતત પ્રયાસ કરી રહ્યું છે. જ્યારે પાડોશીઓ પણ એકબીજાને પૂરતો ટેકો આપી રહ્યા છે. પવનની ઝડપ વધવાની શક્યતાને કારણે સત્તાવાળાએ રહેવાસીઓને સતર્ક રહેવાની સૂચના આપે છે. જંગલની આગને કારણે થયેલા નુકસાનથી ફાયર મેનેજમેન્ટ માટેની વ્યૂહરચનામાં સુધારો કરવાની તાકીદે જરૂર છે. જેથી ભવિષ્યની હોનારતોમાંથી લોકોને બચાવી શકાય.