Kutch,તા.૩૧

કચ્છના માંડવી તાલુકાના ગોધરામાં આજે વહેલી સવારે હત્યાની એક ઘટના બની હતી. આરોગ્ય વિભાગમાં કરાર આધારીત ફરજ બજાવતી યુવતી નોકરી માટે ઘરેથી નીકળી હતી. તે બસની રાહ જોઈ રહી હતી તે દરમિયાન જ એક બાઈક સવાર યુવકે આવીને ફિલ્મી સ્ટાઈલમાં તલવારના અનેક ઘા મારી યુવતીને રહેંસી નાખી હતી. જાહેરમાં હત્યાની ઘટના બનતાં સમગ્ર વિસ્તારમાં ચકચાર પ્રસરી છે. સવારના ૬ વાગ્યાની આસપાસ યુવતીની હત્યાની ઘટના બનતા પોલીસ તંત્ર પણ દોડતું થયું છે.

ગોધરા ગામે પોતાના ઘરેથી નોકરી જવા માટે નીકળેલી ગૌરી ગરવા નામની યુવતી વહેલી સવારે ૬ વાગ્યાના અરસામાં દુર્ગાપુર માર્ગે બસની રાહ જોઈ રહી હતી. ત્યારે બાઇક ઉપર આવેલા અજાણ્યા શખસે યુવતી ઉપર તલવાર વડે હુમલો કર્યો હતો. જાહેરમાં જ તલવાર અને ગુપ્તીના અસંખ્ય ઘા ઝીકીને યુવતીને રહેંસી નાખી હતી. જે બાદ આરોપી ત્યાંથી ફરાર થઈ ગયો હતો. ફિલ્મી સ્ટાઈલમાં આવેલા શખસે નિર્દયતાપૂર્વક યુવતીને મોતને ઘાટ ઉતારી દેતા સમગ્ર વિસ્તારમાં ચકચાર મચી ગઇ હતી.

હત્યા નિપજાવી હત્યારો તલવાર સ્થળ ઉપર ફેંકતો ગયો નોકરી માટે નીકળેલી અંદાજિત ૨૨ વર્ષીય ગોરીબેન તુલસીભાઈ ગરવા નામની યુવતીની તલવારના ઘા ઝીકીને સરાજાહેર હત્યા થતા કાયદો-વ્યવસ્થા પર સવાલો ઉઠ્‌યા છે. બનાવના પગલે ગ્રામજનો અને પરિવારજનો ઘટનાસ્થળે દોડી ગયા હતા. યુવતીના મોતના પગલે સ્વજનોએ બનાવ સ્થળે જ પોક મૂકી રડતા આક્રંદભર્યો માહોલ સર્જાયો હતો. હત્યા મામલે માંડવી પોલીસે હતભાગી યુવતીના મૃતદેહને હાલ પોસ્ટમોર્ટમ અર્થે સરકારી દવાખાને ખસેડ્યો છે. તેમજ સમગ્ર મામલે વધુ તપાસ હાથ ધરી છે. ઉલ્લેખનીય છે કે હત્યા નિપજાવી હત્યારો તલવાર સ્થળ ઉપર ફેંકતો ગયો હતો.