Mumbai,તા.૧૦

એકતા કપૂરના શો ’કસૌટી ઝિંદગી કી’ના સ્ક્રિપ્ટ રાઈટર મહેશ પાંડેની મુંબઈ પોલીસે નિર્માતા જતિન સેઠી સાથે રૂ. ૨.૬૫ કરોડની છેતરપિંડી કરવાના આરોપમાં અટકાયત કરી હતી. પોલીસ સૂત્રોના જણાવ્યા અનુસાર મહેશ પાંડેને કોર્ટમાં રજૂ કરવામાં આવ્યો હતો અને તેને જ્યુડિશિયલ કસ્ટડીમાં મોકલી દેવામાં આવ્યો છે.

આ અંગે અંબોલી પોલીસ સ્ટેશનના વરિષ્ઠ પોલીસ અધિકારીએ કહ્યું- જતિન સેઠીની ફરિયાદના આધારે મહેશ પાંડેની ધરપકડ કરવામાં આવી છે. જતિન સેઠીનો આરોપ છે કે તેણે મહેશ પાંડેને ૨.૬૫ કરોડ રૂપિયાની લોન આપી હતી. પરંતુ મહેશ પાંડેએ પૈસા ચૂકવ્યા ન હતા. મહેશ પાંડેની ધરપકડ અંગે વાત કરતા વકીલ રિઝવાન સિદ્દીકીએ કહ્યું- મહેશ પાંડેની પત્ની મધુ મહેશ પાંડે અને પરિવારના અન્ય સભ્યો વિરુદ્ધ આઈપીસીની કલમ ૪૦૬ અને ૪૨૦ હેઠળ કેસ નોંધવામાં આવ્યો છે.

મહેશ પાંડેએ ટીવી માટે ઘણા શો લખ્યા છે. તેણે પોતાના કરિયરની શરૂઆત ’કહાની ઘર ઘર કી’થી કરી હતી. આ પછી તેણે ’કસૌટી ઝિંદગી કી’, ’કસમ સે’ જેવા ઘણા શો લખ્યા. મહેશ પાંડેએ ઘણી ભોજપુરી ફિલ્મોનું નિર્માણ અને નિર્દેશન પણ કર્યું છે. જેમાંથી એક ફિલ્મ ’ગબ્બર સિંહ’ હતી. આ ફિલ્મને એકતા કપૂરે પ્રોડ્યુસ કરી હતી. આ ફિલ્મ ’શોલે’ની ભોજપુરી રિમેક હતી.