ટ્રમ્પનું કહેવું છે કે કમલા હેરિસની આર્થિક નીતિઓ અમેરિકાને ૧૯૨૯ સ્ટાઈલની મંદીમાં સપડાવી દેશે

Washington, તા.૬

અમેરિકામાં હાલમાં ચૂંટણી છે પરંતુ જનતા મોંઘવારીથી પરેશાન છે. લોકોના ગ્રોસરી બિલ વધી ગયા છે અને ઘરના ભાવ પણ જાણે આસમાને જઈ રહ્યા હોય તેવી સ્થિતિ છે. લોકોને ઘરના ભાડા પણ પોષાતા નથી. તેવામાં ઘણા નિષ્ણાતો કહી ચૂક્યા છે કે અમેરિકામાં આગામી સમયમાં મંદી આવી શકે છે. પરંતુ બીજી વખત અમેરિકન પ્રમુખ બનવા માટે ધમાધમ કરી રહેલા ડોનાલ્ડ ટ્રમ્પે દાવો કર્યો છે કે જો વાઈસ પ્રેસિડેન્ટ કમલા હેરિસનો આર્થિક એજન્ડા અમલમાં મૂકવામાં આવે તો અમેરિકાને ગ્રેટ ડિપ્રેસન એટલે કે મહામંદીમાં ધકેલી દેશે.

ફોક્સ બિઝનેસને આપેલા એક ઈન્ટરવ્યુમાં રિપબ્લિકન પ્રેસિડેન્શિયલ કેન્ડિડેટ ટ્રમ્પે જણાવ્યું હતું કે, કમલા હેરિસ મોટી આફત સાબિત થશે.

જો કમલા હેરિસની પોલિસીને અમલી બનાવવામાં આવે તો અમેરિકા ૧૯૨૯ સ્ટાઈલની મંદીમાં સદી પડશે અને આવું ૧૦૦ ટકા થશે. જેના કારણે કંપનીઓ અમેરિકામાંથી ઉચાળા ભરી લેશે અને નોકરીઓ છીનવાઈ જશે. બધી જ વસ્તુઓ અહીંથી જતી રહેશે. ટ્રમ્પનું કહેવું છે કે, તેમણે જોયેલી કમલા હેરિસ એકમાત્ર વ્યક્તિ છે જે જંગી ટેક્સ વધારાને લઈને પ્રચાર કરી રહી છે.

ભૂતપૂર્વ પ્રમુખે ટેક્સ ફાઉન્ડેશનના તે એનાલિસિસનો પણ ઉલ્લેખ કર્યો હતો જેમાં કહેવામાં આવ્યું હતું કે કમલા હેરિસની ટેક્સ પ્રપોઝલ્સ અમેરિકામાં ૮,૦૦,૦૦૦ નોકરીઓનો ભોગ લેશે. આ ઉપરાંત ટ્રમ્પે ધનિક વ્યક્તિઓ માટે અનરિયલાઈઝ્‌ડ કેપિટલ ગેઈન્સ પર ટેક્સ લગાવવાની ડેમોક્રેટિક પ્રમુખપદના નોમિનીની યોજના વિશે ચેતવણી પણ આપી હતી. ટ્રમ્પનું કહેવું છે કે, કદાચ આ પ્રત્યેક અમેરિકનને લાગું નહીં પડે. પરંતુ જેની પાસે ખેતર છે, જે નાનો બિઝનેસ ચલાવી રહ્યા છે તેમને તેમની મૂડી પર મનસ્વી રીતે ટેક્સ ચૂકવવા માટે દબાણ કરશે. તેથી તમારે મૂડી એકઠી કરવી પડશે, વેચવું પડશે અને સ્ટોક્સ તૂટી જશે. જેના કારણે વધારે સ્ટોક માર્કેટમાં સેલિંગ વધશે. જેનો મતલબ છે મંદી. લોકો આ દેશ છોડીને જતાં રહેશે.

ધ વોલ સ્ટ્રીટ જર્નલ અને ધ ન્યૂયોર્ક ટાઈમ્સના રિપોર્ટ્‌સમાં જણાવવામાં આવ્યું છે કે હેરિસ પ્રમુખ જો બાઈડન દ્વારા તેમના તાજેતરના બજેટ પ્રપોઝલમાં કરવામાં આવેલા ટેક્સ વધારાને સમર્થન આપે છે. કમલા હેરિસના કેમ્પેઈન મુજબ આમાં ૧૦૦ મિલિયન ડોલરથી વધુ સંપત્તિ ધરાવતી વ્યક્તિઓ માટે અનરિયલાઈઝ્‌ડ કેપિટલ ગેઈન્સ પર ૨૫ ટકા ટેક્સ અને કોર્પોરેટ ટેક્સનો રેટ ૨૧ ટકાથી વધારીને ૨૮ ટકા સુધીનો વધારો સામેલ છે. અનરિયલાઈઝ્‌ડ ગેઈન્સ પર ટેક્સ વસૂલવાનું પગલું ધનિક અને કોર્પોરેશનો પર ટેક્સ વધારવાના બાઈડન-હેરિસ એડમિનિસ્ટ્રેશનના વચનને અનુરૂપ છે.

ડોનાલ્ડ ટ્રમ્પ જ નહીં પરંતુ થોડા સમય અગાઉ બિલિયોનેર સ્ટીવ ફોર્બ્સે પણ જણાવ્યું હતું કે, કમલા હેરિસની નીતિઓ મંદી તરફ દોરી જશે. જ્યારે અન્ય એક બિલિયોનેર અને કમલા હેરિસના સમર્થક માર્ક ક્યુબને ગત મહિને એક ઈન્ટરવ્યુમાં કહ્યું હતું કે, કમલા હેરિસનો અનરિયલાઈઝ્‌ડ કેપિટલ ગેઈન્સ ટેક્સ પ્લાન સ્ટોક માર્કેટને ખતમ કરી દેશે, અને જો તેઓ વ્હાઈટ હાઉસ માટે ચૂંટાય છે તો તેમણે આ નીતિઓ અમલમાં મૂકવી જોઈએ નહીં.