Dubai,તા.10
ચેમ્પિયન્સ ટ્રોફીના ફાઈનલમાં ન્યુઝીલેન્ડને પરાસ્ત કરીને ભારતે 12 વર્ષે ‘ટાઈટલ’ જીત્યુ હતું. જયારે 25 વર્ષે ફાઈનલમાં ન્યુઝીલેન્ડને ફાઈનલમાં હરાવીને બદલો લીધો હતો.

સ્પીન ચોકડીની કમાલ તથા ત્યારબાદ બેટરોના મહત્વપૂર્ણ યોગદાનના સહારે ભારતે ચાર વિકેટે જીત હાંસલ કરી લીધી હતી. સળંગ બે આઈસીસી ટ્રોફી જીતવાનું ગૌરવ હાંસલ કર્યુ હતું. ફાઈનલની સાથોસાથ સમગ્ર ટુર્નામેન્ટ દરમ્યાન અનેકવિધ રેકોર્ડ પણ સર્જાયા હતા.

ચેમ્પિયન્સ ટ્રોફીના ફાઈનલમાં વધુ એક વખત ટોસ ગુમાવનાર ભારતે વરૂણ ચક્રવર્તી, કુલદીપ યાદવ, રવિન્દ્ર જાડેજા તથા અક્ષર પટેલની સ્પીન ચોકડીની મદદથી ન્યુઝીલેન્ડને નિયંત્રણમાં રાખ્યુ હતું.

પ્રથમ દાવ લેનાર ન્યુઝીલેન્ડ 251 રન કરી શકયુ હતું. આક્રમક શરૂઆત કર્યા બાદ વરૂણ ચક્રવર્તીએ પ્રથમ ઝટકો આપ્યો હતો. ત્યારબાદ કુલદીપે ઉપરાઉપરી બે વિકેટ ખેડવીને કમ્મર તોડી નાખી હતી.

મિચેલ અને બ્રેસવેલે અર્ધી સદી ફટકારીને કિવીઝને માનભર્યા જુમલે પહોંચાડયુ હતું. ભારત તરફથી વરૂણ અને કુલદીપે બે-બે તથા રવિન્દ્ર જાડેજા અને મોહમ્મદ શામીએ એક-એક વિકેટ ઝડપી હતી.

252 રનનો જુમલો ચેઝ કરવા ઉતરેલ ભારતીય કપ્તાન રોહિત શર્મા તથા ઉપકપ્તાન શુભમન ગીલની જોડીએ પ્રથમ વિકેટમાં 105 રનની ભાગીદારી કરી લીધી હતી, ત્યારે ગીલ, કોહલી અને રોહિતની ઉપરાઉપરી વિકેટ પડતા ‘વન સાઈડેડ’ લાગતો મેચ રોમાંચક બની ગયો હતો.

શ્રેયસ ઐય્યર તથા અક્ષર પટેલે બાજી સંભાળીને ભારતને જીતની નજીક પહોંચાડયું હતું ત્યારે તે બન્ને પણ આઉટ થયા હતા. રાહુલ અને હાર્દિક કેટલાક શોટ ફટકાર્યા હતા. હાર્દિક આઉટ થયો ત્યારે ભારત જીતની ઘણુ સમીપ આવી ગયુ હતુ.

રાહુલ અને રવિન્દ્ર જાડેજાએ ખુટતા રન બનાવીને ભારતને જીત અપાવી દીધી હતી. રવિન્દ્ર જાડેજાએ વિજયી ચોકો ફટકાર્યો હતો. 49 ઓવરમાં વિજય હાંસલ થતાની સાથે જ ભારતીય છાવણી ઉપરાંત દુબઈના આખા સ્ટેડીયમમાં અભૂતપૂર્વ ઉજવણી કરવામાં આવી હતી.

જોરદાર આતશબાજી સાથે આનંદની છોળો ઉડી હતી. ખેલાડીઓએ મેદાન પર જ સેલીબ્રેશન કર્યુ હતું. સ્ટેડિયમમાં તિરંગા ફરકયા હતા અને વંદેમાતરમની ગુંજ ઉઠી હતી. ભારતના યાદગાર વિજયને અભૂતપૂર્વ રીતે વધાવવામાં આવતો હતો.

ટુર્નામેન્ટમાં શ્રેષ્ટ બેટર-બોલર

બેટર
રચીન (કિવીઝ)- 263 રન (4 ઈનિંગ)
શ્રેયસ (ભારત)- 243 રન (5 ઈનિંગ)
ડકેટ (ઈંગ્લેન્ડ)- 227 રન (3 ઈનિંગ)

બોલર
મેટ હેનરી (કિવીઝ)- 10 વિકેટ (4 ઈનિંગ)
વરૂણ ચક્રવર્તી (ભારત)- 9 વિકેટ (3 ઈનિંગ)
મોહમ્મદ શમી (ભારત)- 9 વિકેટ (5 ઈનિંગ)

રોહિત શર્માના નેતૃત્વમાં ભારતે સળંગ બીજી આઈસીસી ટુર્નામેન્ટમાં જીત મેળવી છે. દુબઈમાં ચેમ્પિયન્સ ટ્રોફીમાં ચેમ્પિયન બન્યા પુર્વે ગત જુનમાં ભારતે ટી20 વર્લ્ડકપમાં જીત મેળવી હતી.

ભારતે ત્રીજી વખત ચેમ્પિયન્સ ટ્રોફી જતી છે. આ પુર્વે 2013માં ધોનીના નેતૃત્વમાં વન-ડેમાં વિશ્વવિજેતા બન્યુ હતું. 2002માં ભારત-શ્રીલંકા સંયુક્ત વિજેતા બન્યા હતા.

ટુર્નામેન્ટમાં એક ઈનિંગમાં 362 રનનો સર્વોચ્ચ સ્કોર બન્યો હતો. દક્ષિણ આફ્રિકા સામેના બીજી સેમીફાઈનલમાં ન્યુઝીલેન્ડે 6 વિકેટે 362 રન બનાવ્યા હતા જે ટુર્નામેન્ટના ઈતિહાસનો સૌથી મોટો સ્કોર છે. આ મેચમાં રચીન તથા વિલીયમ્સન બન્નેએ સદી ફટકારી છે.

ચેમ્પિયન્સ ટ્રોફીના ફાઈનલમાં ભારતે યાદગાર જીત હાંસલ કરી છે. એકથી વધુ વખત રસપ્રદ-રોમાંચક તબકકામાં આવી ગયેલા આ મેચનો ટર્નિંગ પોઈન્ટ રચીન રવિન્દ્ર તથા કેન વિલિયમસનની વિકેટ બની હતી.

રચીને ટુર્નામેન્ટમાં બે સદી ફટકારી હતી અને ફુલ ફોર્મમાં હતો. વિલીયમ્સનને સ્પીન એટેક સામે રમવાનો બહોળો અનુભવ હતો. બન્ને વ્હેલા આઉટ થતા તે ટર્નીંગ પોઈન્ટ બન્યો હતો. બન્નેને કુલદીપે જ આઉટ કર્યા હતા.