New Delhi,તા.૭

વડા પ્રધાન નરેન્દ્ર મોદી અને ફ્રાન્સના રાષ્ટ્રપતિ ઇમેન્યુઅલ મેક્રોન ૧૨ ફેબ્રુઆરીએ માર્સેલીમાં ભારતીય કોન્સ્યુલેટનું સંયુક્ત રીતે ઉદ્‌ઘાટન કરશે. પ્રધાનમંત્રી મોદીની ફ્રાન્સ મુલાકાત દરમિયાન આ દૂતાવાસનું ઉદ્‌ઘાટન કરવામાં આવશે. માર્સેલી એ ફ્રાન્સના દક્ષિણમાં, ભૂમધ્ય સમુદ્ર કિનારે આવેલું એક શહેર છે. ૨૦૨૩માં વડા પ્રધાન નરેન્દ્ર મોદીની ફ્રાન્સ મુલાકાત દરમિયાન માર્સેલીમાં ભારતીય કોન્સ્યુલેટ ખોલવાની જાહેરાત કરવામાં આવી હતી.

માર્સેલી એક વ્યૂહાત્મક રીતે મહત્વપૂર્ણ શહેર છે અને ભારત પણ માર્સેલી બંદરનો ઉપયોગ કરવા આતુર છે. ખાસ વાત એ છે કે અહીં કોઈ અન્ય વિદેશી શક્તિની ભૂમિકા કે હાજરી નથી. માર્સેલી બંદર ફ્રાન્સનું સૌથી મોટું બંદર છે અને ભૂમધ્ય સમુદ્રના સૌથી મોટા બંદરોમાંનું એક છે. આ બંદર ફ્રાન્સની આયાત અને નિકાસમાં ખૂબ જ મહત્વપૂર્ણ ભૂમિકા ભજવે છે. તેને યુરોપ, આફ્રિકા, મધ્ય પૂર્વ અને એશિયા વચ્ચે માલની અવરજવર માટે પ્રવેશદ્વાર તરીકે પણ જોવામાં આવે છે.

પ્રધાનમંત્રી નરેન્દ્ર મોદીએ લા સીન મ્યુઝિકલ ખાતે ભારતીય સમુદાયને સંબોધિત કરતી વખતે ૨૦૨૩ માં માર્સેલીમાં ભારતના કોન્સ્યુલેટ જનરલ ખોલવાની જાહેરાત કરી હતી. પેરિસમાં દૂતાવાસ પછી, કોન્સ્યુલેટ જનરલ ભારતનું બીજું રાજદ્વારી મિશન છે. આ કોન્સ્યુલર સેવાઓમાં મદદ કરશે. હવે લોકોને કોન્સ્યુલેટ સંબંધિત કામ માટે રાજધાની પેરિસ જવું પડશે નહીં.

પીએમ મોદી અને મેક્રોન પ્રથમ વિશ્વયુદ્ધમાં લડનારા લગભગ ૯૦૦ ભારતીય સૈનિકોને શ્રદ્ધાંજલિ પણ આપશે. પ્રથમ વિશ્વયુદ્ધ દરમિયાન ફ્રાન્સમાં ભારતીય સૈનિકો માટે માર્સેલ્સ બેઝ હતું. જુલાઈ ૧૯૨૫માં ફિલ્ડ માર્શલ સર વિલિયમ બર્ડવુડ દ્વારા શહીદ ભારતીય સૈનિકોના સન્માનમાં એક ભારતીય સ્મારકનું અનાવરણ કરવામાં આવ્યું હતું.