આરોપી પરિવારના સભ્યોનો ગુનો શું છે તેની વિગતો દર્શાવવી જરૂરી, મનફાવે તેને આરોપી ના બનાવી શકો તેવી ટકોર
New Delhi, તા.૮
એક મહત્વપૂર્ણ ચુકાદામાં સુપ્રીમ કોર્ટે કોઇ જ વિશિષ્ટ આરોપો વગર ઘરેલુ હિંસાના કેસોમાં પરિવારના સભ્યોને ફસાવવાના કેસોની સુનાવણી દરમિયાન સાવચેતી રાખવાની ટકોર કરી હતી. સુપ્રીમના ન્યાયાધીશ બી. વી. નાગરત્ના અને ન્યાયાધીશ એન. કોટિશ્વરસિંહની બેંચે કહ્યું હતું કે ઘરેલુ હિંસાના કેસોમાં પરિવારના સભ્યો સામે નક્કર આરોપો વગર જ આડેધડ આરોપી ના બનાવી શકાય. આમ કરીને ગુનાહિત પ્રક્રિયાનો દુરુપયોગ ના કરી શકો. ઘરેલુ હિંસાના એક મામલામાં ફરિયાદી મહિલાએ પતિ અને તેમના પરિવારના લોકોને તો આરોપી બનાવ્યા જ હતા સાથે પતિના માસી અને પિતરાઇ ભાઇ સહિત પરિવારના અન્ય લોકોને પણ આરોપી બનાવ્યા હતા અને ફરિયાદ દાખલ કરાવી હતી. પરિણામે આરોપીઓ દ્વારા તેલંગાણા હાઇકોર્ટમાં અપીલ કરાઇ હતી, હાઇકોર્ટે શરૂઆતમાં પરિવારના અન્ય લોકો સામેની ફરિયાદ રદ કરવાની ના પાડી દીધી હતી, બાદમાં પરિવારના લોકો સુપ્રીમ કોર્ટ પહોંચ્યા હતા. સુપ્રીમ કોર્ટે હાઇકોર્ટના ચુકાદાને પલટીને કહ્યું હતું કે પરિવારના અન્ય લોકોને આરોપી બનાવવામાં આવ્યા તેમની સામે કોઇ વિશેષ આરોપો જ નથી, લગ્ન સંબંધી મામલાઓમાં લાગણીઓ વધી જાય છે, જેનાથી કેસમાં અતિશયોક્તિ થઇ શકે છે જે બાદમાં ઘરેલુ વિવાદોમાં અયોગ્ય રીતે આપરાધિક મામલામાં ફેરવાઇ શકે છે. જ્યારે ગુસ્સો વધી જાય અને સંબંધો ખરાબ થાય છે ત્યારે આરોપોને વધારીને રજુ કરવાની વૃત્તિ પણ તેમાં સામેલ હોય છે. પરંતુ તેનો એ મતલબ નથી કે આવા ઘરેલુ વિવાદોને ગુનાનો રંગ અપાય. સુપ્રીમ કોર્ટે પરિવાર સંસ્થાની મહત્વની ભૂમિકા પર પ્રકાશ પાડયો હતો અને તેને માનવ સમાજનું મૂળ ગણાવી હતી.સુપ્રીમે કહ્યું હતું કે આ પરિવાર સંસ્થા પ્રેમ, સ્નેહ અને એકબીજા પરના વિશ્વાસના પાયા પર બની છે. કાયદાનો ઉદ્દેશ્ય ઘરેલુ હિંસાનો શિકાર બનતી મહિલાઓના રક્ષણ માટે છે, તેનો ઉપયોગ યોગ્ય પુરાવા વગર જ પારિવારિક સંબંધો તોડવા માટે ના કરી શકાય. જો પરિવારના અન્ય સભ્યો હિંસા કે ઝઘડામાં સામેલ ના થાય કે પીડિતને મદદ ના કરે તો તેનો મતલબ એ નથી કે તેમને પણ ઘરેલુ હિંસાના કેસમાં આરોપી બનાવી દેવાય. આ કેસમાં પીડિતાએ જ કાયદાનો દુરુપયોગ કર્યાનું સાબિત થાય છે. પીડિતાએ તમામને આરોપી તો બનાવ્યા પણ તેમનો શું ગુનો છે તે સાબિત ના થયું, સુપ્રીમે કહ્યું હતું કે આવા મામલામાં પરિવારના ક્યા સભ્યએ ક્યો ગુનો કર્યો તે દર્શાવવું જરૂરી છે.