Himmatnagar,તા.૨૪

ગુજરાતની સરકારી કચેરીઓમાં ફરજ બજાવતા તમામ કર્મચારીઓ માટે સરકારે કચેરીમાં વાહન લઈને આવતા અગાઉ ફરજિયાત હેલ્મેટ પહેરવો પડશે તેવો કાયદો અમલી બની ગયો છે ત્યારે બુધવારે જિલ્લા કલેક્ટરની સૂચનાથી આરટીઓ કચેરીના અધિકારીઓ દ્વારા જાગૃતિના ભાગરૂપે કર્મચારીઓનું ચેકિંગ કરાયું હતુ.

આ અંગે આરટીઓ અધિકારી તપન મકવાણા તથા ઈન્સ્પેકટર ચાવડાના જણાવાયા મુજબ, તાજેતરમાં જિલ્લા કલેક્ટર ર્ડા. રતનકંવર ચારણગઢવીની ઉપસ્થિતિમાં કલેક્ટર કચેરી ખાતે યોજાયેલી બેઠકમાં ચર્ચા દરમિયાન રાજ્ય સરકારે સરકારી કર્મચારીઓ માટે હેલ્મેટનો કાયદો અમલી બનાવ્યો છે ત્યારે તેની શરૂઆત જિલ્લાના મુખ્ય મથક હિંમતનગર સ્થિત કલેક્ટર કચેરીથી કરવા માટે સૂચન કર્યું હતું.

જે આધારે બુધવારે કલેક્ટર કચેરીમાં આવેલા વિવિધ વિભાગમાં ફરજ બજાવતા કર્મચારીઓ અને અધિકારીઓ હેલ્મેટના કાયદાનો અમલ કરે છે કે નહીં તે તપાસવા માટે વાહન ચેકિંગ શરૂ કરાયું હતુ. સવારે ૧૦ વાગ્યાથી ચેકિંગની કામગીરી શરૂ કરાઈ હતી. પૂર્ણ થઈ ત્યાં સુધીમાં લગભગ રપ૦થી વધુ સરકારી કર્મચારીઓએ હેલ્મેટ ધારણ કર્યા ન હતા. જેથી તેમની પાસેથી હેલ્મેટના કાયદાનો ભંગ બદલ અંદાજે રૂ.પ૦૦ તથા આરટીઓના અન્ય નિયમોનો ભંગ કરવા બદલ કાયદેસરની કાર્યવાહી હાથ ધરાઈ હતી. જેથી અન્ય સરકારી કર્મચારીઓમાં ફફડાટ ફેલાઈ ગયો હતો.

ઉલ્લેખનીય છે કે, રાજ્ય સરકારે બનાવેલા હેલ્મેટના કાયદાનો ચૂસ્ત અમલ કરાવવા માટે આરટીઓનું તંત્ર કટીબદ્ધ છે ત્યારે આગામી દિવસોમાં હિંમતનગર સ્થિત જિલ્લાના અન્ય તાલુકા મથકે આવેલી સરકારી કચેરીઓમાં ફરજ બજાવતા કર્મચારીઓ જાગૃત બને તે માટે હેલ્મેટ ચેકિંગ શરૂ કરવામાં આવશે.