Kasganj,તા.૩

૨૬ જાન્યુઆરી ૨૦૧૮ના રોજ તિરંગા યાત્રા દરમિયાન માર્યા ગયેલા ચંદન ગુપ્તાના પરિવારજનોને લગભગ સાત વર્ષ બાદ આજે ન્યાય મળ્યો છે.એનઆઇએ કોર્ટે શુક્રવારે ૨૮ દોષિતોને આજીવન કેદની સજા ફટકારી છે. ચંદન ગુપ્તાના પરિવારજનોએ કોર્ટના નિર્ણયનું સ્વાગત કર્યું છે. ગુનેગારોને આજીવન કેદની સજા થતાં પરિવારે ઘરે તિરંગો લહેરાવીને ઉજવણી કરી હતી.

લખનૌની એઆઇએ કોર્ટના નિર્ણય પર પ્રતિક્રિયા આપતા ચંદન ગુપ્તાના માતા-પિતાએ કહ્યું કે અમે કોર્ટના આદેશનું સ્વાગત કરીએ છીએ. પરિવારે કહ્યું કે ગુનેગારોને સજા કરવામાં વિલંબ થયો પરંતુ સત્યનો વિજય થયો છે. અમે તેનું સ્વાગત કરીએ છીએ. ચંદનના પિતાએ કહ્યું કે અમે કોર્ટના નિર્ણયથી સંતુષ્ટ છીએ. ન્યાયતંત્રએ અમને ન્યાય આપ્યો છે. અમે કોર્ટનો પણ આભાર માનીએ છીએ. દરમિયાન ચંદનની માતા સંગીતા ગુપ્તાએ કહ્યું કે અમારી પાસેથી બધું છીનવી લેવામાં આવ્યું છે. અમે ઘણો સંઘર્ષ કર્યો છે. બધાની વાત સાંભળી. અમે કોર્ટનો આભાર માનીએ છીએ. લાંબા સમય બાદ અમને ન્યાય મળ્યો છે.

જણાવી દઈએ કે લખનૌની એનઆઇએ કોર્ટે શુક્રવારે ૨૬ જાન્યુઆરી ૨૦૧૮ના રોજ કાસગંજમાં સાંપ્રદાયિક હિંસા દરમિયાન ૨૨ વર્ષીય ચંદન ગુપ્તાની હત્યાના મામલામાં ૨૮ દોષિતોને આજીવન કેદની સજા સંભળાવી હતી. તિરંગા યાત્રા દરમિયાન આ હિંસા ફાટી નીકળી હતી. અધિક જિલ્લા અને સત્ર ન્યાયાધીશે ભારતીય દંડ સંહિતાની વિવિધ કલમો હેઠળ ગુનેગારોને દોષિત ઠેરવ્યા હતા, જેમાં ૩૦૨ (હત્યા), ૩૦૭ (હત્યાનો પ્રયાસ), ૧૪૭ (હુલ્લડ) અને ૧૪૯ (ગેરકાયદેસર સભા)નો સમાવેશ થાય છે.

દોષિત વ્યક્તિઓમાં વસીમ, નસીમ, ઝાહિદ ઉર્ફે જગ્ગા, બબલુ, અકરમ, મોહસીન, રાહત, સલમાન અને અન્યનો સમાવેશ થાય છે. તમામને જેલમાં મોકલી દેવામાં આવ્યા છે. એક દોષિત, મુનાજીર રફી, વીડિયો કોન્ફરન્સિંગ દ્વારા હાજર થયો હતો જ્યારે સલીમ વિરુદ્ધ ધરપકડ વોરંટ જારી કરવામાં આવ્યું હતું, જે વ્હીલચેર પર કોર્ટમાં હાજર હતો.

એડિશનલ ડીજીસી (ક્રિમિનલ) એમકે સિંઘે જણાવ્યું હતું કે ફરિયાદ પક્ષે ૧૮ સાક્ષીઓ રજૂ કર્યા હતા, જ્યારે બચાવ પક્ષે ૨૩ સાક્ષીઓ રજૂ કર્યા હતા. જુલાઈ ૨૦૧૮ માં કાસગંજ પોલીસ દ્વારા દાખલ કરાયેલ ચાર્જશીટને કારણે કેસ એનઆઇએ કોર્ટમાં ટ્રાન્સફર કરવામાં આવ્યો, જ્યાં ૨ સપ્ટેમ્બર ૨૦૧૯ ના રોજ આરોપો ઘડવામાં આવ્યા.