કાર્યભાર સંભાળ્યા બાદ પ્રથમ વખત આતિશી કનોટ પ્લેસના હનુમાન મંદિર પહોંચ્યા અને દર્શન કર્યા. તેમણે ઠ પર ત્યાંની તસવીરો શેર કરી

New Delhi,તા.૨૪

દિલ્હીના મુખ્યમંત્રી બન્યા બાદ આતિશી મંગળવારે કષ્ટભંજન હનુમાનજીની શરણમાં પહોંચ્યા હતા. કાર્યભાર સંભાળ્યા બાદ પ્રથમ વખત આતિશી કનોટ પ્લેસના હનુમાન મંદિર પહોંચ્યા અને દર્શન કર્યા. તેમણે ઠ પર ત્યાંની તસવીરો શેર કરી હતી. તેમણે કેપ્શનમાં લખ્યું કે, કનોટ પ્લેસ સ્થિત પ્રાચીન હનુમાન મંદિરમાં હનુમાનજીના આશીર્વાદ લીધા. સંકટ મોચનને મારી એક જ પ્રાર્થના છે કે તેમના આશીર્વાદ હંમેશા આપણા બધાની સાથે રહે, અમે દિલ્હીના લોકો માટે કામ કરતા રહીએ અને આવનારી ચૂંટણીઓ પછી કેજરીવાલ ફરી એકવાર મુખ્યમંત્રી બને.

આ દરમિયાન તેમને પૂછવામાં આવ્યું કે તેમણે ભગવાન પાસે શું માંગ્યું? ત્યારે મુખ્યમંત્રી આતિશીએ કહ્યું કે આજે મેં કનોટ પ્લેસના આ પ્રાચીન હનુમાન મંદિરમાં દર્શન કર્યા હતા, છેલ્લા ૨ વર્ષમાં આમ આદમી પાર્ટી પર, દિલ્હી સરકાર પર તમામ પ્રકારના હુમલા થયા હતા , દુશ્મનોએ અમારા નેતા અરવિંદ કેજરીવાલ જીને અને અમને દબાવવાની, અમને ચૂપ કરવાની કોશિશ કરી, પરંતુ હનુમાનજીએ દરેક સંકટમાં આમ આદમી પાર્ટીનું રક્ષણ કર્યું છે.

તેમણે વધુમાં કહ્યું કે તેમણે અરવિંદ કેજરીવાલ જીની રક્ષા કરી છે, દિલ્હી સરકારની રક્ષા કરી છે અને દિલ્હીના લોકોની રક્ષા કરી છે, તેથી આજે મેં હનુમાનજી પાસેથી એક જ વસ્તુ માંગી છે કે હનુમાનજી હંમેશા તેમની કૃપા રાખે. તેમના આશીર્વાદ સાથે દિલ્હીની પ્રજા માટે કામ કરતા રહીએ અને તેમના આશીર્વાદ સાથે આવનારી ચૂંટણીમાં અરવિંદ કેજરીવાલ દિલ્હીના મુખ્યમંત્રી બને.

૧૭ સપ્ટેમ્બરના રોજ અરવિંદ કેજરીવાલે દિલ્હીના મુખ્યમંત્રી પદ પરથી રાજીનામું આપ્યું હતું. તે જ દિવસે, આતિશીને વિધાયક દળની બેઠકમાં ધારાસભ્ય દળના નેતા તરીકે ચૂંટવામાં આવ્યા હતા. રાષ્ટ્રપતિની મંજૂરી પછી, ૨૧ સપ્ટેમ્બરના રોજ, આતિશીએ ૫ કેબિનેટ મંત્રીઓ સાથે મુખ્યમંત્રી તરીકે શપથ લીધા. આમ આદમી પાર્ટીના સૌથી મોટા અરવિંદ કેજરીવાલ હોય, મનીષ સિસોદિયા અને સંજય સિંહ, ખાસ પ્રસંગોએ કનોટ પ્લેસના આ પ્રાચીન હનુમાન મંદિરની મુલાકાત લેતા હોય છે.