“પુરુષે કેમ મહિલા ઇવેન્ટમાં ભાગ લીધો” સોશ્યલ મીડિયામાં આક્રોશ : ઈટાલીના પ્રધાનમંત્રી મેલોનીએ પણ રોષ વ્યક્ત કર્યો, કહ્યું આ સમાન લડાઈ નથી

 પાસપોર્ટ પર સ્ત્રી લખ્યું છે, અમે કઈ ન કરી શકીએ : ઇન્ટરનેશનલ ઓલિમ્પિક્સ એસો.નો બચાવ 

Paris,તા.02

પેરિસ ઓલિમ્પિકમાં મહિલા બોક્સિંગ મેચને લઈને વિવાદ શરૂ થઈ ગયો છે. આ મેચ ગુરુવારે ઈટાલીની એન્જેલા કેરિની અને અલ્જીરિયાની ઈમાન ખલીફ વચ્ચે રમાઈ રહી હતી.

એન્જેલા માત્ર 46 સેકન્ડમાં જ મેચમાંથી બહાર થઈ ગઈ હતી. એન્જેલાએ કહ્યું- ‘મને ક્યારેય આ રીતે મુક્કો મારવામાં આવ્યો નથી. હું અહીં જજ નથી. આ મેચ સાચી હતી કે ખોટી તે નક્કી કરવાનું કામ મારું નથી.

હકીકતમાં, ઈમાન, જેની સામે એન્જેલાએ મેચમાંથી ખસી ગઈ હતી, તે એક વર્ષ પહેલા ઈન્ટરનેશનલ બોક્સિંગ એસોસિએશન (આઈબીએ) દ્વારા લિંગ પરીક્ષણમાં પાસ થઈ નહોતી. IBAએ ગયા વર્ષે દિલ્હીમાં યોજાયેલી મહિલા વર્લ્ડ ચેમ્પિયનશિપની ગોલ્ડ મેડલ મેચમાં ઈમાનને રમવાની મંજૂરી આપી ન હતી.

હવે ઈમાન ઓલિમ્પિકમાં પોતાની પ્રથમ મેચ જીત્યા બાદ સોશિયલ મીડિયા પર સવાલો ઉઠી રહ્યા છે કે રિંગમાં મહિલાની સામે પુરુષને કેમ બેસાડી દેવામાં આવ્યો. IBAએ ઇન્ટરનેશનલ ઓલિમ્પિક કમિટી (IOC) પર પણ સવાલ ઉઠાવ્યા છે. IBAએ કહ્યું કે, IOC નિયમોનું ઉલ્લંઘન કરી રહી છે. મહિલા ખેલાડીઓના ન્યાય અને સુરક્ષાને બાકાત રાખવામાં આવી છે.

મહિલા બોક્સિંગ મેચ દરમિયાન શું થયું?
મહિલાઓની 66 કિગ્રા વર્ગમાં રાઉન્ડ ઓફ 16ની મેચ એન્જેલા અને ઈમાન વચ્ચે હતી. એન્જેલા રિંગમાં પ્રવેશી અને ઈમાનના પહેલા મુક્કાથી તેના માથાના સેફ્ટી ગિયરની ચેઈન તૂટી ગઈ. બીજા મુક્કામાં તેના નાકમાંથી લોહી નીકળવા લાગ્યું. આ પછી એન્જેલા રિંગની બહાર થઈ ગઈ હતી. આખી મેચ માત્ર 46 સેકન્ડ ચાલી હતી.

મેચમાંથી ખસી ગયેલી મહિલા બોક્સરે શું કહ્યું?
એન્જેલાએ કહ્યું- મેં આવો મુક્કો ક્યારેય નથી લીધો. મારું હૃદય તૂટી ગયું. હું એક યોદ્ધા છું, મેં મારા પિતાના સન્માન માટે રિંગમાં પ્રવેશ કર્યો હતો, પરંતુ મારા સ્વાસ્થ્યની સુરક્ષા માટે મેં મેચમાંથી ખસી જવું જરૂરી માન્યું હતું.

આ મેચ સાચી હતી કે ખોટી તે નક્કી કરવાનું કામ મારું નથી. મેં હમણાં જ મારું કામ કર્યું, મેં રિંગમાં પ્રવેશ કર્યો, પરંતુ મારા નાકમાં એટલી પીડા હતી કે મેં દૂર જવાનું નક્કી કર્યું. આટલો અનુભવ હોવા છતાં, હું કહું છું કે મારા જીવનમાં આટલો જોરદાર મુક્કો મને ક્યારેય લાગ્યો નથી.

ઈમાન ખલીફા અને લિંગ પરીક્ષણની બાબત શું છે?
ઈમાન અને એન્જેલા વચ્ચેની મેચ પહેલા પણ ઓલિમ્પિક કમિટી શંકાના દાયરામાં હતી. ઈમાન ખલીફા અને ચાઈનીઝ તાઈપેઈના બોક્સર લિન યુ ટીંગ 2023માં IBA દ્વારા લિંગ પરીક્ષણમાં ફેલ થયા હતા.

ઇન્ટરનેશનલ એમેચ્યોર બોક્સિંગ પ્રેસિડેન્ટ ઓમર ક્રેમલેવે ધ ગાર્ડિયનને કહ્યું, ‘લિંગ ટેસ્ટથી સાબિત થયું કે ઇમાનમાં XY રંગસૂત્રો છે, જે પુરુષોમાં જોવા મળે છે. તેથી જ તેના પર પ્રતિબંધ મૂકવામાં આવ્યો હતો. ઈમાને કોર્ટમાં પણ અપીલ કરી હતી, પરંતુ પ્રક્રિયા દરમિયાન તેણે અપીલ પાછી ખેંચી લીધી હતી.

ઓલિમ્પિક સમિતિએ લિંગ પરીક્ષણ પર શું કહ્યું છે?
આંતરરાષ્ટ્રીય ઓલિમ્પિક સમિતિના પ્રવક્તા માર્ક એડમ્સે કહ્યું, ‘તમામ ખેલાડીઓએ પાત્રતાના નિયમોનું પાલન કર્યું છે. અહીં કોઈ પણ પ્રકારની ટ્રાન્સજેન્ડર સમસ્યા નથી. લીન અને ઈમાનના પાસપોર્ટ પર ‘સ્ત્રી’ લખેલું છે.

લિંગ પરીક્ષણ શું છે?
રમતગમતમાં લિંગ પરીક્ષણ ખેલાડીનું લિંગ નક્કી કરવા માટે કરવામાં આવે છે. આમાં, એથ્લેટમાં પુરૂષ હોર્મોનનું સ્તર શોધી કાઢવામાં આવે છે. જો સંબંધિત રમતવીરમાં પુરૂષ પ્રબળ હોર્મોન નિર્ધારિત માત્રા કરતા વધી જાય, તો તેને સ્પર્ધામાં ભાગ લેવા પર પ્રતિબંધ છે.

મેચ બાદ ઈટલી વડાપ્રધાન મેલોની બોક્સરને મળી, હિંમત વધારી

મેચ રદ થયા બાદ ઇટાલીની બોક્સરને પેરિસમાં વડાપ્રધાન મેલોનો મળ્યા અને હિંમત વધારી.તેઓએ ટિપ્પણી કરી હતી કે, મને લાગે છે કે પુરૂષ આનુવંશિક લાક્ષણિકતાઓ ધરાવતા એથ્લેટ્સને મહિલા સ્પર્ધાઓમાં પ્રવેશ આપવો જોઈએ નહીં, આ સમાનતાની લડાઈ નથી.