મનોજ બાજપાઈએ એક ઇન્ટરવ્યૂમાં કહ્યું કે આ સિરીઝના આખરી ભાગનું શૂટિંગ ડિસેમ્બરમાં પૂરું થઈ જશે

Mumbai, તા.૨૩

મનોજ બાજપાઈની ફિલ્મો અને સિરીઝ એક પછી એક વિવિધ ઓટીટી પ્લેટફર્મ પર આવતા જ રહે છે, પરંતુ ‘ધ ફેમિલી મેન’તેની સૌથી વધુ લોકપ્રિય થયેલી અને જેની આગામી સીઝનની સૌથી વધુ રાહ જોવાય છે, તેવી સિરીઝ છે. તાજેતરમાં મનોજ બાજપાઈએ એક ઇન્ટરવ્યૂમાં કહ્યું કે આ સિરીઝના આખરી ભાગનું શૂટિંગ ડિસેમ્બરમાં પૂરું થઈ જશે. ત્યાર બાદ ટીમને પોસ્ટ પ્રોડક્શનમાં ૯થી ૧૨ મહિનાનો સમય લાગશે. મનોજ બાજપાઈના જણાવ્યા અનુસાર, ‘ધ ફેમિલી મેન ૩’ દિવાળી ૨૦૨૫ની આસપાસ રિલીઝ થશે.તાજેતરના ઇન્ટરવ્યૂમાં મનોજ બાજપાઈને પૂછવામાં આવ્યું કે આ સિરીઝ લગભગ ક્યારે આવશે, જેના જવાબમાં આ શોમાં લીડ રોલ કરતાં મનોજ બાજપાઈએ કહ્યું કે પ્રોડક્શનનું કામ લગભગ ડિસેમ્બર ૨૦૨૪માં પૂરું થઈ જશે એવું લાગે છે. ત્યાર બાદ અલગ અલગ ભાષામાં ડબિંગ, સબટાઇટલ્સ તૈયાર કરવામાં અને વર્લ્ડવાઇડ માર્કેટિંગ સ્ટ્રેટેજી તૈયાર કરવામાં ૯ થી ૧૨ મહિના જેટલો સમય લાગે છે. મનોજ બાજપાઈએ કહ્યું,“એક લાંબો લસ સમય લાગે છે, મને લાગે છે આવતી દિવાળી સુધીમાં આવી જવી જોઈએ.” આગળ તેમણે કહ્યું, કે એડિટ થયા પછી નક્કી થશે કે આ સીઝનમાં કેટલા એપિસોડ હશે. પરંતુ ટીમ બહુ ઝડપથી એના માટે કામ કરી રહ્યા છે. એમેઝોન દ્વારા મે ૨૦૨૪માં આ સીઝનની જાહેરાત કરવામાં આવી હતી. ત્યારે મનોજ બાજપાઈએ કહ્યું કે આ વખતની સ્ટોરી પહેલાં કરતાં વધુ જટિલ અને મોટી હશે. આગળ તેણે કહ્યું, આ વખતે શ્રીકાંત તિવારીને વધુ કપરા પડકારોનો સામનો કરવો પડશે, જેમાં તેણે પોતાની જાતને બચાવવા માટે ઘણી અંગત અને પ્રોફેશનલ સમસ્યાઓનો સામનો કરવો પડશે. તેથી શોની કથાવસ્તુ અંગે તેના ફૅન્સ વધુ ઉત્સાહિત છે.