Maharashtra,તા.૨૯

મહારાષ્ટ્ર વિધાનસભા ચૂંટણીમાં જીત પછી, રાષ્ટ્રવાદી કોંગ્રેસ પાર્ટી (એનસીપી) ના વડા અજિત પવારે જાહેરાત કરી કે તેમની પાર્ટી દિલ્હી વિધાનસભાની ચૂંટણી લડશે, જેથી એનસીપીને રાષ્ટ્રીય પક્ષ તરીકે પુનઃસ્થાપિત કરી શકાય. રાષ્ટ્રીય રાજધાનીમાં એનસીપી કાર્યાલય ખાતે આયોજિત સન્માન સમારોહને સંબોધતા અજિત પવારે મહારાષ્ટ્ર ચૂંટણીમાં ઈવીએમ સાથે ચેડાં કરવાના વિપક્ષના આરોપોને ફગાવી દીધા હતા. તેમણે કહ્યું કે મહાગઠબંધન એકજુટ છે અને ટૂંક સમયમાં સરકાર બનાવશે.

પવારે કહ્યું કે ચૂંટણી પરિણામો જાહેર થયા બાદ મહાયુતિના નેતાઓ પ્રથમ વખત મળ્યા હતા. તેમણે કહ્યું કે, “અમે એક છીએ… કોઈ મતભેદ નથી.” પવારે કહ્યું, “તેમના આરોપોમાં કોઈ સત્ય નથી. તેઓ ઈવીએમ પર આરોપ લગાવી રહ્યા છે કારણ કે તેમને વિધાનસભા ચૂંટણીમાં સાનુકૂળ પરિણામ ન મળ્યું.કોંગ્રેસ અને શરદચંદ્ર પવારની પાર્ટી એનસીપી (એસપી) એ વિધાનસભા ચૂંટણીમાં ઈવીએમના ઉપયોગ પર શંકા વ્યક્ત કરી છે અને મતદાન માટે બેલેટ પેપરનો ઉપયોગ કરવાની જૂની પરંપરા પાછી લાવવાની માંગ કરી છે.

જ્યારે એનસીપીની ભાવિ યોજનાઓ વિશે પૂછવામાં આવ્યું ત્યારે તેમણે કહ્યું કે અગાઉ એનસીપીને રાષ્ટ્રીય પક્ષનો દરજ્જો મળ્યો હતો પરંતુ હવે તે તેને પાછો મેળવવા માટે કામ કરશે. પવારે કહ્યું, “અમારે હવે વધુ કામ કરવાની જરૂર છે.” અમે લડીશું અને સફળતા મેળવીશું.’’ એનસીપીએ ગયા વર્ષે એપ્રિલમાં રાષ્ટ્રીય પક્ષનો દરજ્જો ગુમાવ્યો હતો. અજિત પવારે કહ્યું, “અમારું આગામી લક્ષ્ય દિલ્હી વિધાનસભા ચૂંટણી છે. અમે ટૂંક સમયમાં રાષ્ટ્રીય રાજધાનીમાં એનસીપીનું રાષ્ટ્રીય સંમેલન યોજીશું.’’ પવારે કહ્યું કે તેઓ મહારાષ્ટ્રમાં સત્તાની વહેંચણીની વ્યવસ્થા અંગે ચર્ચા કરવા રાષ્ટ્રીય રાજધાની આવ્યા છે.

મહારાષ્ટ્રમાં તાજેતરમાં યોજાયેલી વિધાનસભા ચૂંટણીમાં સત્તાધારી ગઠબંધન મહાયુતિને પ્રચંડ બહુમતી મળી છે. મહારાષ્ટ્રના આગામી મુખ્ય પ્રધાન વિશે પવારે કહ્યું કે તેઓ અને ભાજપના નેતા દેવેન્દ્ર ફડણવીસ, વિદાય લેતા મુખ્ય પ્રધાન એકનાથ શિંદે અને કેન્દ્રીય ભાજપના નેતાઓ એક બેઠક કરશે, જેમાં આ અંગે નિર્ણય લેવામાં આવશે. પવારે કહ્યું કે શાસક ગઠબંધને વિધાનસભા ચૂંટણીમાં મુખ્યમંત્રી પદ માટે કોઈ ચહેરો નહીં ઉતારવાનો નિર્ણય લીધો છે.