Rajkot,તા.૨૫

સૌરાષ્ટ્ર યુનિવર્સિટીમાં અર્થશાસ્ત્ર ભવનના આસિસ્ટન્ટ પ્રોફેસર સામે કોલેજની ૫ વિદ્યાર્થિનીઓએ દ્વિઅર્થી સંવાદ બોલવા અંગે આક્ષેપો કરતા ખળભળાટ મચી ગયો છે. તેમજ ચોક્કસ જ્ઞાતિના છાત્રોને માર્ક આપવાની વાત કર્યાનો આરોપ મૂકવામાં આવ્યો છે.

રાજકોટમાં આવેલ સૌરાષ્ટ્ર યુનિવર્સિટી ફરી એકવાર વિવાદમાં આવી છે. અર્થશાસ્ત્ર ભવનના આસિસ્ટન્ટ પ્રોફેસર વિવાદમાં આવ્યા છે. ૫ વિદ્યાર્થિનીઓએ પ્રોફેસર સામે દ્વિઅર્થી સંવાદ બોલવાના વિદ્યાર્થિનીઓએ આક્ષેપો કર્યા છે. ચોક્કસ જ્ઞાતિના છાત્રોને માર્ક આપવાની વાતોનો આરોપ આસિસ્ટન્ટ પ્રોફેસર ડૉ. સંજય પંડ્યા સામે કરવામાં આવ્યો છે. તેમના જ ભવનની છાત્રાઓએ સીએમઓ સુધી ફરિયાદ કરતા સૌરાષ્ટ્ર યુનિવર્સિટી સહિત સમગ્ર રાજ્યમાં ખળભળાટ મચી ગયો છે.

રાજ્ય મહિલા આયોગ દ્વારા યુનિવર્સિટીના કુલપતિને તપાસના આદેશ અપાયા છે. મહિલા આયોગે મેઇલ કરી સમગ્ર મામલે કુલપતિને જાણ કરી છે. વિદ્યાર્થિનીઓ દ્વારા કરાયેલા આક્ષેપોમાં ખરેખર કેટલું તથ્ય છે તે તપાસ બાદ સામે આવશે. તો બીજી બાજુ તાજેતરમાં જૂનાગઢનાં ભેંસાણની સરકારી વિનયન કોલેજમાં આસિસ્ટન્ટ પ્રોફેસરે વિદ્યાર્થિનીની છેડતી કર્યાનો આક્ષેપ કરવામાં આવ્યો હતો. વિદ્યાર્થિનીને સચિન પીઠડિયાએ બિભત્સ મેસેજ કરી કોલેજના ઇન્ટર્નલ માર્ક ઓછા આપવાની ધમકી આપતા આખરે પ્રિન્સિપાલને જાણ કરી હતી, આ માટે તપાસ કમિટીની રચના કરવામાં આવી છે તેમજ પોલીસ સુધી વિવાદ પહોંચતા પ્રોફેસરનું સમાધાન થઈ ગયું હોવાનું રટણ કરતો જોવા મળ્યો છે.

કોલેજની વિદ્યાર્થીનીઓએ ભયભીત થતાં સમગ્ર મામલે પ્રિન્સિપાલને જાણ કરી હતી. પ્રિન્સિપાલ દ્વારા તપાસ માટે કમિટીની રચના કરવામાં આવી છે. વિદ્યાર્થિનીની છેડતીનો સમગ્ર મામલો પોલીસ સ્ટેશન પહોંચ્યો હતો. ત્યારે આસિ. પ્રોફેસરનું સમગ્ર મામલે સમાધાન થઈ ગયું હોવાનું રટણ કરતો રહ્યો છે. આ મામલેે ઝડપથી વિદ્યાર્થિનીઓને ન્યાય મળે તેમ વાલીઓએ અરજી કરી હોવાનું જાણવા મળ્યું છે.

થોડા દિવસો અગાઉ અમદાવાદ શહેરમાં લો ગાર્ડન વિસ્તારમાં આવેલી જીએલએસ યુનિવર્સિટી કેમ્પસમાં એસએમપીઆઇસી કોલેજના પ્રોફેસર ચાર મહિનાથી વિદ્યાર્થીને મેસેજ કરી રહ્યા હતા. એટલું જ નહીં, તે વિદ્યાર્થીને પોતાની સાથે આવવા માટે મેસેજ પણ કરી રહ્યો હતો. આનાથી કંટાળીને, વિદ્યાર્થીએ કોલેજમાં ફરિયાદ કરી અને પ્રોફેસર ભાવિક સ્વાદિયાને સસ્પેન્ડ કરવામાં આવ્યા હતા.