New Delhi, તા.13
પર્વતીય રાજ્યોમાં સતત હિમવર્ષાને પગલે પાટનગર દિલ્હી સહિતના ઉત્તર ભારતના રાજ્યો ફરી વખત કાતિલ ઠંડીની લપેટમાં સપડાયા છે. જો કે આજે ધુમ્મસમાં આંશિક રાહત હતી. સામાન્ય ધુમ્મસ વચ્ચે ત્રણ દિવસનું ઓરેન્જ એલર્ટ યથાવત રાખવામાં આવ્યું છે.

હવામાન વિભાગના રીપોર્ટ મુજબ હળવા વરસાદને કારણે ઠંડી વધી ગઇ છે અને તેમાંથી તાત્કાલીક રાહત મળવાની સંભાવના નથી. પાટનગરમાં ધુમ્મસનું પ્રમાણ સામાન્ય જ હોવા છતાં ટ્રેનોના સમયપત્રક વેરવિખેર જ હતા. અમુક ટ્રેનો અગાઉથી જ રદ કરવામાં આવી હતી. કેટલીક ટ્રેનો કલાકો મોડી હતી.

દિલ્હીમાં રવિવારે સૂર્યનારાયણના દર્શન થયા ન હતા. બુધવાર સુધી વેસ્ટર્ન ડીસ્ટર્બન્સની અસર રહેવાની શક્યતા વચ્ચે હળવો વરસાદ થવાની પણ આગાહી કરવામાં આવી છે.

બીજી તરફ ઉત્તરાખંડ સહિતના પર્વતીય રાજ્યોમાં સતત હિમવર્ષા રહી હતી. સિમલા-ચૌપાલ હાઇવે બંધ કરી દેવામાં આવ્યો હતો. ચારધામ, હેમકુંડ, ઔલીમાં સતત બરફ વરસતો રહ્યો હતો. કેદારનાથ ધામમાં 3 ફૂટ બરફ જામવા સાથે તાપમાન માઇનસ 19 ડીગ્રી રહ્યું હતું. ઉત્તર પ્રદેશ, પંજાબ, હરિયાણામાં હળવા વરસાદ વચ્ચે શીતલહેરની સ્થિતિ હતી.