Adelaide,તા.૪

એડિલેડમાં ઓસ્ટ્રેલિયા સામેની બીજી ટેસ્ટ મેચ પહેલા ભારતીય ટીમ ઉત્સાહિત દેખાઈ રહી છે. મેચ પહેલા ભારતીય ખેલાડીઓએ એડિલેડમાં ફૂટબોલ મેચની મજા માણી હતી. ટીમને બે ગ્રૂપમાં વહેંચવામાં આવી હતી અને એક તરફ સિનિયર ખેલાડીઓ અને બીજી તરફ જુનિયર ખેલાડીઓ જોવા મળ્યા હતા. ભારત અને ઓસ્ટ્રેલિયા વચ્ચે બીજી ટેસ્ટ ૬ ડિસેમ્બરથી શરૂ થઈ રહી છે. આ ગુલાબી બોલથી રમાતી ડે નાઇટ ટેસ્ટ હશે.

એડિલેડમાં ભારતીય ટીમનું પ્રેક્ટિસ સેશન જોવા માટે ચાહકો પણ હાજર હતા. આવી સ્થિતિમાં ખેલાડીઓએ પોતાનો ઉત્સાહ વધારવા માટે ફૂટબોલ મેચ રમી હતી. પ્રેક્ટિસ સેશનની તસવીરો અને વીડિયોમાં વિરાટ કોહલી અને રોહિત શર્મા બંને મેચમાં ભાગ લેતા જોવા મળ્યા હતા. ચાહકોએ આ ક્ષણને ઘણી એન્જોય કરી અને ઉત્સાહિત જોવા મળ્યા. સોશિયલ મીડિયા પર કેટલીક પોસ્ટ્‌સ અનુસાર, ઋષભ પંત જુનિયર ટીમમાં અન્ય યુવા ક્રિકેટરોની સાથે ટીમમાં હતો. જ્યારે, વિરાટ, રોહિત અને અશ્વિન અને કોચિંગ સ્ટાફના કેટલાક સભ્યો એક ટીમમાં હતા.

યશસ્વી જયસ્વાલ અને વિરાટ કોહલીને એડિલેડ ટેસ્ટમાં કેટલાક રેકોર્ડ બનાવવાની તક મળશે. તે મહાન સચિન તેંડુલકર અને ડોન બ્રેડમેનને પાછળ છોડી શકે છે. ભારત એડિલેડમાં ઓસ્ટ્રેલિયન ટીમ પર મનોવૈજ્ઞાનિક ધાર સાથે રમતમાં ઉતરશે. ટીમ ઈન્ડિયાએ પર્થમાં રમાયેલી પ્રથમ ટેસ્ટ ૨૯૫ રનથી જીતી હતી. જોકે ટીમ ઈન્ડિયા ઓસ્ટ્રેલિયામાં છેલ્લી ડે નાઈટ ટેસ્ટ ચૂકવાનું પસંદ કરશે નહીં. ૨૦૨૦માં એડિલેડમાં રમાયેલી પિંક બોલ ટેસ્ટમાં ઓસ્ટ્રેલિયાએ બીજી ઇનિંગમાં ભારતને ૩૬ રનમાં ઓલઆઉટ કરી દીધું હતું અને તેને ૯૦ રનનો આસાન ટાર્ગેટ મળ્યો હતો. પેટ કમિન્સ (૨૧ રનમાં ચાર વિકેટ) અને જોશ હેઝલવુડ (આઠ રનમાં પાંચ વિકેટ)એ તબાહી મચાવી હતી. જોકે, આ વખતે હેઝલવુડ ઈજાના કારણે બીજી ટેસ્ટમાં નહીં રમે.

૨૨ વર્ષીય યશસ્વીએ આ વર્ષે અત્યાર સુધી ટેસ્ટમાં ૫૮.૧૮ની સરેરાશ અને ૭૨.૫૨ની સ્ટ્રાઈક રેટથી ૧,૨૮૦ રન બનાવ્યા છે, જેમાં ત્રણ સદી અને સાત અડધી સદીનો સમાવેશ થાય છે. તેનો સર્વશ્રેષ્ઠ સ્કોર અણનમ ૨૧૪ રન છે. આ યુવા ખેલાડી એક કેલેન્ડર વર્ષમાં ભારતીય દ્વારા સૌથી વધુ ટેસ્ટ રનના સચિનના રેકોર્ડને તોડવાથી ૨૮૨ રન દૂર છે. સચિને ૨૦૧૦માં ૧૪ ટેસ્ટ અને ૨૩ ઇનિંગ્સમાં ૭૮.૧૦ની એવરેજથી ૧,૫૬૨ રન બનાવ્યા હતા, જેમાં સાત સદી અને પાંચ અડધી સદીનો સમાવેશ થાય છે. તેનો સર્વશ્રેષ્ઠ સ્કોર પણ ૨૧૪ રન હતો. એક કેલેન્ડર વર્ષમાં સૌથી વધુ ટેસ્ટ રન પાકિસ્તાનના દિગ્ગજ બેટ્‌સમેન મોહમ્મદ યુસુફના નામે છે. ૨૦૦૬માં તેણે ૧૧ મેચ અને ૧૯ ઇનિંગ્સમાં ૯૯.૩૩ની એવરેજથી ૧,૭૮૮ રન બનાવ્યા હતા. તેણે ૨૦૨ના શ્રેષ્ઠ સ્કોર સાથે નવ સદી અને ત્રણ અડધી સદી ફટકારી હતી.