Guwahati,તા.૩૧
રાજસ્થાન રોયલ્સ ટીમ ૩૦ માર્ચે આઇપીએલ ૨૦૨૫ માં પોતાની પહેલી જીત નોંધાવવામાં સફળ રહી. ગુવાહાટીમાં રમાયેલી મેચમાં રાજસ્થાને ચેન્નાઈ સુપર કિંગ્સને ૬ રનથી હરાવ્યું. આ રીતે, રાજસ્થાન રોયલ્સના કાર્યકારી કેપ્ટન રિયાન પરાગે તેમની કેપ્ટનશીપ હેઠળ પ્રથમ વિજયનો સ્વાદ ચાખ્યો. જોકે, આ જીત સાથે તેના માટે એક ખરાબ સમાચાર પણ આવ્યા છે. રિયાન પરાગ પર ભારે દંડ ફટકારવામાં આવ્યો છે. ચેન્નાઈ સામેની મેચમાં ધીમા ઓવર રેટ બદલ તેના પર આ દંડ ફટકારવામાં આવ્યો છે. ઈન્ડિયન પ્રીમિયર લીગ એટલે કે આઈપીએલે આ માહિતી આપી.
આઇપીએલએ રવિવારે એક નિવેદનમાં જણાવ્યું હતું કે, ગુવાહાટીના બારસાપારા ક્રિકેટ સ્ટેડિયમ ખાતે ચેન્નાઈ સુપર કિંગ્સ સામે ઇન્ડિયન પ્રીમિયર લીગ ૨૦૨૫ ની ૧૧મી મેચ દરમિયાન રાજસ્થાન રોયલ્સના કેપ્ટન રિયાન પરાગને ધીમો ઓવર રેટ જાળવવા બદલ દંડ ફટકારવામાં આવ્યો છે. નિવેદન અનુસાર,આઇપીએલ આચારસંહિતાના નિયમ ૨.૨ હેઠળ ન્યૂનતમ ઓવર-રેટના ગુનાઓ સંબંધિત આ સિઝનમાં તેની ટીમનો આ પહેલો ગુનો હતો, તેથી રિયાન પરાગ પર ૧૨ લાખ રૂપિયાનો દંડ ફટકારવામાં આવ્યો છે.
આઇપીએલ ૨૦૨૫ માં આ પહેલી વાર નથી જ્યારે કોઈ કેપ્ટનને સ્લો ઓવર રેટ માટે દંડ ફટકારવામાં આવ્યો હોય. રિયાન પરાગ પહેલા મુંબઈ ઈન્ડિયન્સના કેપ્ટન હાર્દિક પંડ્યાને પણ દંડનો સામનો કરવો પડી ચૂક્યો છે. ગુજરાત ટાઇટન્સ સામે રમાયેલી મેચમાં ધીમા ઓવર રેટને કારણે તેને ૧૨ લાખ રૂપિયાનો દંડ ફટકારવામાં આવ્યો હતો. ગયા સિઝનમાં, આ જ ભૂલને કારણે, હાર્દિક પર એક મેચ માટે પ્રતિબંધ મૂકવામાં આવ્યો હતો, જેના કારણે તે આઇપીએલા ૨૦૨૫ માં મુંબઈ માટે પહેલી મેચ રમી શક્યો ન હતો. નોંધનીય છે કે સંજુ સેમસન સંપૂર્ણપણે ફિટ ન હોવાથી રિયાન પરાગ રાજસ્થાન રોયલ્સના કાર્યકારી કેપ્ટન છે. આ જ કારણ છે કે સંજુ અત્યાર સુધી રાજસ્થાન માટે ફક્ત એક નિષ્ણાત બેટ્સમેન તરીકે રમતા જોવા મળ્યા છે જ્યારે ધ્રુવ જુરેલ વિકેટકીપરની ભૂમિકામાં જોવા મળ્યા છે. હવે એ જોવું રસપ્રદ રહેશે કે સંજુ ક્યારે કેપ્ટન તરીકે પરત ફરી શકશે.
