ઉનાળામાં જરી અને સિલ્ક પહેરવું એ દેખાવમાં ભલે સારું લાગે, પણ પસીનાને લીધે એન્જોયમેન્ટ સાઇડ પર જ રહી જતું હોય છે. સાડીઓનું ફેબ્રિક અને ત્યાર બાદ એના પર કરવામાં આવેલું હેન્ડવર્ક અને એમ્બ્રોઇડરી અને વધુ હેવી બનાવે છે જે બપોરના સમયે પહેરવા માટે જરા પણ સૂટેબલ નથી. પર્યાયમાં ઘણાં ફૅબ્રિક્સ છે જેને આપણે એ રિચ ન લાગે એવું કહીને પહેરવાનું ટાળતા હોઈએ છીએ. જુઓ કઈ રીતે કમ્ફર્ટેબલ અને કૂલ ફેબ્રિક્સને રિચ લુક આપી શકાય.
ઉનાળામાં આરામ આપે એવા ફેબ્રિકનું નામ પડતાં માઇન્ડમાં સૌથી પહેલાં કૉટન આવે. જોકે કૉટનની સાડી પહેરીને લગ્નમાં જવાનો વિચાર ભાગ્યે જ કોઈ કરશે. પણ જો ક્રીએટિવિટી અને ડિઝાઇનિંગનો થોડો ટચ મળે તો કૉટન પણ રિચ બની શકે છે. કૉટનનો બેઝ લઈ એમાં પલુ અને પ્લીટ્સમાં કૉટન સિલ્ક અથવા કોઈ બીજા રંગને કૉટન ફૅબ્રિક જ ઉમેરી એક ડિઝાઇનર સાડી બનાવી શકાય. એ સિવાય કોટન સિલ્ક પણ બેસ્ટ લાગે છે.કૉટનની બાંધણી ભૂલી જાઓ, એના બદલે કોટન બેઝ્ડ પટોળું લઈ એના પર લેસ મુકાવી એને લગ્નમાં પહેરવા લાયક બનાવો. એ સિવાય કોટનની પ્લેન સાડી પર ગોલ્ડન અથવા કોન્ટ્રાસ્ટ શાઈની કલરથી બાટિક અથવા બ્લોક પ્રિન્ટ કરાવો જેમાં બોર્ડરમાં જુદા પ્રકારે અને અંદરના મેઇન પાર્ટમાં છુટ્ટી બુટ્ટીઓ પ્રિન્ટ કરાવી શકાય. ગોલ્ડન બાટિક અને બ્લૉક પ્રિન્ટ કરેલી સાડીઓ ટિપિકલ જરદોસી કરતાં જુદી અને હટકે લાગશે. તેમ જ સિમ્પલ હોવાને લીધે ટિક્કી અને સ્ટોનની ભીડમાં જુદી તરી આવશે.કેરળમાં ગોલ્ડન બોર્ડરવાળી સફેદ અથવા ઑફવાઇટ કૉટનની સાડી લગ્ન જેવા પ્રસંગોએ પહેરવા માટે શુભ ગણવામાં આવે છે. આ સાડી દિવસના સમયે લગ્નપ્રસંગોમાં પહેરવા માટે બેસ્ટ છે. સિમ્પલ હોવાની સાથે એ સૉફિસ્ટિકેટેડ લુક આપે છે. સિમ્પલ ઢબે પહેરેલી આ સાડી, એની સાથે ગોલ્ડનો નાજુક લક્ષ્મી હાર અથવા ટેમ્પલ જ્વેલરી અને માથામાં અંબોડા સાથે મોગરાનો ગજરો. આ બેસ્ટ લુક છે.
ઉનાળામાં બને એટલા સૉફ્ટ રંગો પહેરો. જોકે સૉફ્ટ એટલે ડલ નહીં. યલો, પિન્ક, વાઇટ, સ્કાય બ્લુ, ગ્રે જેવા રંગો લગ્નપ્રસંગોમાં સારા લાગે છે. આ કલર્સ સાથે સિલ્વર અથવા ગોલ્ડન એમ બન્ને શેડ્સની એમ્બ્રૉઇડરી સારી લાગશે. સાડીમાં વર્ક પણ હેવી પસંદ ન કરતાં કાશ્મીરી દોરા વર્ક કે પારસી વર્ક પસંદ કરવું. એ સિવાય આપણું કચ્છી અને દેશી ભરત પણ સાડીઓ પર કલાત્મક રીતે કરવામાં આવે તો સારું લાગે છે. રંગો ગમે તે પહેરો, પણ ગરમીની દ્રષ્ટિએ બ્લેક લગ્નમાં પહેરવાનું ટાળવું.
ઉનાળામાં આપણે ત્યાં ભેજવાળું વાતાવરણ હોવાને લીધે પસીનો અને ગરમી રાતના સમયે પણ થાય છે. જોકે રાતના સમયે કૉટન પહેરવાનો આઇડિયા પણ સારો નથી. શિફૉન કે જ્યૉર્જેટ જેવાં લાઇટ વેઇટ ફૅબ્રિક્સ રાતના સમયે સારાં રહેશે અને લાગશે પણ સારાં. માત્ર જ્વેલરી પર થોડું કન્સેશન આપવું અને વધુપડતી હેવી જ્વેલરીને બદલે ડાયમન્ડ અથવા પર્લનો એકાદ ડેલિકેટ નેકલેસ પહેરવો.
આ સીઝનમાં વાળ ખુલ્લા રહે એવી કોઈ પણ હેરસ્ટાઇલ કરાવતાં પહેલાં વિચારી લેવું કે પસીનાથી વાળ ખરાબ થશે અને ખુલ્લી પીઠ પણ. એટલે ટ્રેડિશનલ લગ્ન સમયે અંબોડો કે ચોટલો એવી ટ્રેડિશનલ હેરસ્ટાઇલ પસંદ કરવી અને રાતના સમયે વેસ્ટર્ન હેરસ્ટાઇલમાં રેટ્રો સ્ટાઇલનો બન સારો લાગશે.
