Patna,તા.૧૧
આ વર્ષના અંતમાં બિહારમાં વિધાનસભા ચૂંટણી યોજાવાની છે, જેના માટે તમામ રાજકીય પક્ષોએ પોતાની તૈયારીઓ શરૂ કરી દીધી-૦ છે. આ જ ક્રમમાં, કોંગ્રેસ પાર્ટી બિહારમાં ’સ્થળાંતર રોકો, નોકરી આપો’ કૂચનું આયોજન કરી રહી છે. આ કૂચનું નેતૃત્વ એનએસયુઆઇના રાષ્ટ્રીય પ્રભારી કન્હૈયા કુમાર કરી રહ્યા છે. શુક્રવારે, કન્હૈયા કુમાર અને અન્ય કોંગ્રેસ કાર્યકરોએ મુખ્યમંત્રીના નિવાસસ્થાન તરફ કૂચ કરવાનો પ્રયાસ કર્યો. અહીં તેમની પોલીસ સાથે અથડામણ થઈ. પોલીસે કન્હૈયા કુમાર અને અનેક કોંગ્રેસ કાર્યકરોને કસ્ટડીમાં લીધા છે.
પટના પોલીસે એનએસયુઆઇના રાષ્ટ્રીય પ્રભારી કન્હૈયા કુમાર અને કોંગ્રેસના કાર્યકરોની અટકાયત કર્યા બાદ તેમને કોતવાલી પોલીસ સ્ટેશન લાવવામાં આવ્યા છે. કોંગ્રેસના કાર્યકરોના ’સ્થળાંતર રોકો, નોકરી આપો’ કૂચ દરમિયાન, જ્યારે તેમને મુખ્યમંત્રીના નિવાસસ્થાન તરફ આગળ વધતા અટકાવવામાં આવ્યા ત્યારે પોલીસ સાથે ઘર્ષણ થયું. વાસ્તવમાં, યુથ કોંગ્રેસના કાર્યકરો સીએમ હાઉસનો ઘેરાવ કરવા અને સીએમ નીતિશ કુમારને મેમોરેન્ડમ સુપરત કરવા માંગતા હતા. કન્હૈયા કુમારની સાથે યુથ કોંગ્રેસના અનેક પદાધિકારીઓની પણ અટકાયત કરવામાં આવી છે. તેને પટનાના કોતવાલી પોલીસ સ્ટેશન લાવવામાં આવ્યો છે.
શુક્રવારે કોંગ્રેસ પટનામાં રસ્તા પર ઉતરી આવી. કન્હૈયા કુમારના નેતૃત્વમાં કોંગ્રેસે પટણામાં મોટું વિરોધ પ્રદર્શન કર્યું અને સીએમ હાઉસનો ઘેરાવ કરવાનો પ્રયાસ કર્યો. જોકે, પોલીસે કોંગ્રેસના વિરોધ પ્રદર્શનને અધવચ્ચે જ અટકાવી દીધું હતું, ત્યારબાદ પ્રદર્શનકારીઓ અને પોલીસ વચ્ચે ઝપાઝપી થઈ હતી. પોલીસે વોટર કેનનનો ઉપયોગ કર્યો અને પરિસ્થિતિ કાબુ બહાર જતા પોલીસે પ્રદર્શનકારીઓ પર હળવો લાઠીચાર્જ પણ કર્યો. આ પછી, કન્હૈયા કુમાર સહિત ઘણા વિરોધીઓને કસ્ટડીમાં લેવામાં આવ્યા હતા.
