Mumbai, તા.૩૧

બોલિવૂડ સુપરસ્ટાર સલમાન ખાનને ફરી એકવાર જાનથી મારી નાખવાની ધમકી મળી છે. મુંબઈ પોલીસના ટ્રાફિક કંટ્રોલ રૂમને ધમકીભર્યો મેસેજ મળ્યો હતો. મેસેજ મોકલનાર વ્યક્તિએ ૨ કરોડ રૂપિયાની માંગણી પણ કરી છે. મેસેજમાં ધમકી આપવામાં આવી હતી કે જો પૈસા આપવામાં નહીં આવે તો તે સલમાન ખાનને મારી નાખશે. પોલીસે આ કેસમાં બાંદ્રાના આઝામ મોહમ્મદ મુસ્તફા નામના એક ઈસમની ધરપકડ કરી છે. ઉલ્લેખનીય છે કે આ મહિનાની શરૂઆતમાં સલમાન ખાનને જાનથી મારી નાખવાની ધમકી મળી હતી. મુંબઈ ટ્રાફિક પોલીસના વોટ્‌સએપ નંબર પર પણ આવા જ ધમકીભર્યા મેસેજ આવ્યા હતા, જેમાં સલમાન ખાન પાસેથી ૫ કરોડ રૂપિયાની ખંડણી માંગવામાં આવી હતી. બોલીવુડ સ્ટાર સલમાનખાનને મારી નાખવાની ધમકી આપનાર અને બાબા સિદ્દીકી હત્યા કેસ પછી ચર્ચામાં આવેલા ગેંગસ્ટર લોરેન્સ બિશ્નોઈ પર ડઝનો કેસ ચાલી રહ્યા છે. આ દરમિયાન, લોરેન્સ બિશ્નોઈને અખિલ ભારતીય જીવ રક્ષા યુવા મોરચાના રાષ્ટ્રીય અધ્યક્ષ બનાવવામાં આવ્યો છે. હરિયાણામાં લોરેન્સ બિશ્નોઈના સમાજના લોકોએ આ નિર્ણયનું સ્વાગત કર્યુ છે. ફતેહાબાદ બિશ્નોઈ સમાજના પૂર્વ જિલ્લા પ્રમુખ હંસરાજ ગોદારાએ કહ્યું કે, આ નિર્ણયથી યુવાનોમાં જીવો પ્રત્યે દયા ભાવ જાગશે. લોરેન્સ બિશ્નોઈને રાષ્ટ્રીય અધ્યક્ષ બનાવવા પર સમાજના યુવાનોમાં ઉત્સાહ જોવા મળી રહ્યો છે.