Srinagar,તા.૯
જમ્મુ-કાશ્મીરમાં નેશનલ કોન્ફરન્સ અને કોંગ્રેસના ગઠબંધનને જનાદેશ મળ્યો છે. જેકેએનસી ઉપાધ્યક્ષ ઓમર અબ્દુલ્લા રાજ્યના નવા મુખ્યમંત્રી બનશે. મીડિયા સાથે વાતચીત દરમિયાન ઓમર અબ્દુલ્લાએ કહ્યું કે દિલ્હી અને અમારી વચ્ચે તફાવત છે. દિલ્હી ક્યારેય સંપૂર્ણ રાજ્ય નહોતું અને કોઈએ તેને રાજ્ય બનાવવાનું વચન આપ્યું ન હતું. ૨૦૧૯ પહેલા, જમ્મુ અને કાશ્મીર એક રાજ્ય હતું અને અમને રાજ્યનો દરજ્જો પુનઃસ્થાપિત કરવાનું વચન આપવામાં આવ્યું છે.
વડા પ્રધાન નરેન્દ્ર મોદી, કેન્દ્રીય ગૃહ પ્રધાન અમિત શાહ સહિત ભાજપના ઘણા વરિષ્ઠ નેતાઓએ આ વચન આપ્યું છે અને વારંવાર કહ્યું છે કે જમ્મુ અને કાશ્મીરમાં ત્રણ પગલાં લેવામાં આવશે – સીમાંકન, ચૂંટણી અને પછી રાજ્યનો દરજ્જો. સીમાંકન અને ચૂંટણી થઈ ગઈ છે, હવે રાજ્યનો દરજ્જો બાકી છે. અહીં સરકાર બન્યા પછી મને આશા છે કે કેબિનેટનો પહેલો નિર્ણય રાજ્યનો દરજ્જો આપવાનો પ્રસ્તાવ પસાર કરવાનો હશે અને પ્રસ્તાવ પીએમ મોદીને મોકલવામાં આવશે.
તેઓ બડગામ અને ગાંદરબલ વચ્ચે કઈ સીટ છોડશે, ઓમર અબ્દુલ્લાએ કહ્યું કે તેઓ બંને સીટ રાખી શકતા નથી. મારે એક બેઠક છોડી દેવી પડશે. હું મારા સાથીદારો સાથે ચર્ચા કરીશ અને તમને નિર્ણય વિશે જણાવીશ. અબ્દુલ્લાએ કહ્યું કે થોડા મહિના પહેલા જ્યારે બારામુલ્લાના પરિણામો આવી રહ્યા હતા (લોકસભા ચૂંટણીમાં), હું શરૂઆતમાં આગળ હતો, પરંતુ અડધા કલાકમાં તે બદલાઈ ગયો અને અંતર વધી ગયું. મેં હંમેશા કહ્યું છે કે એક્ઝિટ પોલ એ સમયનો વ્યય છે.
જમ્મુ-કાશ્મીર વિધાનસભામાં ૫ નામાંકિત ધારાસભ્યો પર ઓમર અબ્દુલ્લાએ કહ્યું કે હું તેમને એવું ન કરવાનું સૂચન કરીશ. આ ૫ લોકોને નોમિનેટ કરીને સરકાર નહીં બદલાય તો તેનો શો ફાયદો? તમે બિનજરૂરી રીતે ૫ લોકોને વિપક્ષમાં બેસવા માટે નોમિનેટ કરશો. લડત થશે કારણ કે અમારે ફરીથી સુપ્રીમ કોર્ટમાં જવું પડશે અને તેની સામે અપીલ કરવી પડશે. સરકાર બનવા દો, તેમને સૂચનો આપવા દો અને તેના આધારે એલજીની નિમણૂક કરવી જોઈએ. આ ૫ ધારાસભ્યો કોઈ ફેરફાર નહીં લાવે. અપક્ષ ઉમેદવારો અમારી સાથે વાત કરી રહ્યા છે, તેઓ અમારી સાથે જોડાશે જેથી અમારી લીડ વધે.
જેકેએનસી-કોંગ્રેસ ગઠબંધનની ચૂંટણીમાં જીત બાદ ઓમર અબ્દુલ્લાએ કહ્યું કે હું જમ્મુ અને કાશ્મીરના મતદારોનો તેમના મતનો ઉપયોગ કરવા માટે ખૂબ આભારી છું. છેલ્લા ૮-૧૦ વર્ષથી અહીં લોકશાહીને ખીલવા દેવામાં આવી ન હતી. જેકેએનસી-કોંગ્રેસ ગઠબંધનને બહુમતી મળી. મતદારોએ સમજી વિચારીને મતદાન કર્યું, ખાસ કરીને એવા વિસ્તારોમાં જ્યાં અપક્ષ ઉમેદવારો અને નાના પક્ષો દ્વારા મતોની વહેંચણી માટે કાવતરું ઘડવામાં આવ્યું હતું. અમારી જવાબદારી હવે શરૂ થાય છે, મતદારોએ તેમની ફરજ બજાવી છે. હવે કામ કરવું અને મતદારોની અપેક્ષાઓ પર ખરા ઉતરવું એ આપણી ફરજ છે.
