ગોવાહાટી,તા.૨૯
આસામના ગર્ભંગા જંગલમાં બનેલી એક દુઃખદ ઘટનાએ બધાને ચોંકાવી દીધા. પ્રખ્યાત વેબ સિરીઝ ’ફેમિલી મેન’ સીઝન ૩ માં પોતાના અભિનયથી નામ બનાવનાર અભિનેતા રોહિત બાસફોરનું શંકાસ્પદ સંજોગોમાં મૃત્યુ થયું. મીડિયા રિપોર્ટ્સ અનુસાર, રોહિત તેના મિત્રો સાથે પિકનિક માટે ગયો હતો, પરંતુ આ યાત્રાએ તેનો જીવ લઈ લીધો. પરિવારે તેને અકસ્માત નહીં પણ હત્યા ગણાવી છે અને પોલીસ પાસેથી સંપૂર્ણ તપાસની માંગ કરી છે.
મૂળ આસામનો રહેવાસી રોહિત થોડા મહિના પહેલા મુંબઈથી પોતાના વતન પાછો ફર્યો હતો. રવિવારે બપોરે લગભગ ૧૨ઃ૩૦ વાગ્યે, તે તેના મિત્રો સાથે ગર્ભંગા જંગલમાં પિકનિક માટે નીકળ્યો. તેમણે પરિવારને આ ટૂંકી સફર વિશે જાણ કરી હતી. પરંતુ બપોર પછી, જ્યારે તેનો ફોન બંધ થઈ ગયો અને તેનો સંપર્ક થઈ શક્યો નહીં, ત્યારે પરિવારની ચિંતા વધી ગઈ. થોડા સમય પછી, રોહિતના મિત્રએ પરિવારને ફોન કરીને જાણ કરી કે અકસ્માત થયો છે. રોહિતને તાત્કાલિક નજીકની હોસ્પિટલમાં લઈ જવામાં આવ્યો, પરંતુ ડોક્ટરોએ તેને મૃત જાહેર કર્યો. આ સમાચારથી પરિવારને આઘાત લાગ્યો. પરિવારે તાત્કાલિક સ્ટેટ ડિઝાસ્ટર રિસ્પોન્સ ફોર્સ (જીડ્ઢઇહ્લ) ને જાણ કરી, જેમણે રોહિતનો મૃતદેહ બહાર કાઢ્યો અને તેને પોસ્ટમોર્ટમ માટે મોકલી આપ્યો.
ગુવાહાટી મેડિકલ કોલેજ હોસ્પિટલમાં કરાયેલા પોસ્ટમોર્ટમથી કેસ વધુ રહસ્યમય બન્યો. રિપોર્ટ અનુસાર, રોહિતના માથા, ચહેરા અને શરીરના અન્ય ભાગો પર અનેક ગંભીર ઈજાઓ જોવા મળી હતી. આ ઇજાઓ શંકા પેદા કરે છે કે આ ખરેખર અકસ્માત હતો કે બીજું કંઈક. શરૂઆતની તપાસમાં પોલીસે તેને અકસ્માત માન્યું હતું, પરંતુ પરિવારના આરોપો અને પોસ્ટમોર્ટમ રિપોર્ટ બાદ હવે આ કેસની ઊંડી તપાસ શરૂ થઈ ગઈ છે.
રોહિતના પરિવારે સ્પષ્ટપણે તેને હત્યાનો કેસ ગણાવ્યો છે. તે કહે છે કે રોહિતનો તાજેતરમાં કેટલાક લોકો સાથે પાર્કિંગને લઈને વિવાદ થયો હતો. આ વિવાદમાં, ત્રણ માણસો, રણજીત બાસફોર, અશોક બાસફોર અને ધરમ બાસફોરે રોહિતને મારી નાખવાની ધમકી આપી હોવાનો આરોપ છે. પરિવારે જીમના માલિક અમરદીપ પર પણ શંકા વ્યક્ત કરી છે, જેણે રોહિતને ફરવા માટે બોલાવ્યો હતો. આશ્ચર્યજનક રીતે, ઘટના બાદથી ચારેય આરોપીઓ ફરાર છે, જેના કારણે પોલીસ તપાસ વધુ જટિલ બની છે.
