Surat,તા.૨૭
સુરત શહેરમાં કથિત આરટીઆઇ ખંડણીખોરો સામે કાર્યવાહી કરવામાં આવી રહી છે. ઉધના વિસ્તારના ભૂતપૂર્વ કોર્પોરેટર પ્રકાશ દેસાઈ આરટીઆઇનો દુરુપયોગ કરીને પૈસા પડાવતા ઝડપાયા હતા.એસઓજી ટીમે તેને ૩ લાખ રૂપિયા લેતા રંગે હાથે ઝડપી પાડ્યો છે.
સુરતમાં પ્રકાશ દેસાઈએ આ કેસમાં ‘થિયેટર’ અને ‘ટિકિટ’ નામના કોડવર્ડ્સ તૈયાર કર્યા હતા. જેમાં વિરોધ પ્રદર્શન માટે ‘થિયેટર’નો ઉપયોગ કરવામાં આવ્યો હતો અને પૈસા એકત્ર કરવા માટે ‘ટિકિટ’નો ઉપયોગ કરવામાં આવ્યો હતો. એક ટિકિટ કોડવર્ડની કિંમત પહેલા ૧ લાખ રૂપિયા હતી. આ કોડવર્ડના આધારે, લીઓ ક્લાસીસના મેનેજર પાસેથી ૪.૫૦ ટિકિટ (રૂ. ૪.૫૦ લાખ) ની માંગણી કરવામાં આવી હતી. પ્રકાશ દેસાઈએ લિયો ક્લાસીસ વિરુદ્ધ ઘણી વખત આરટીઆઇ દાખલ કરી હતી અને મ્યુનિસિપલ કોર્પોરેશનના મુખ્યાલયની બહાર ધરણા કરવાની ધમકી આપી હતી.
મહાનગરપાલિકા દ્વારા તપાસ બાદ પણ જવાબ મળ્યો કે કોઈ ગેરકાયદેસર બાંધકામ થયું નથી, પરંતુ દબાણ વધી રહ્યું હતું. તે આરટીઆઇને ધમકીના હથિયાર તરીકે ઉપયોગ કરીને ખંડણી માંગી રહ્યો હતો. જ્યારે તે આખરે ૩ લાખ રૂપિયાની ટિકિટ ખરીદી રહ્યો હતો, ત્યારે એસઓજીએ છટકું ગોઠવ્યું અને તેને રંગે હાથે પકડી લીધો. મહત્વનું છે કે પ્રકાશ દેસાઈનો એક વીડિયો પણ સામે આવ્યો છે, જેમાં તેઓ પોતાના ઘરમાં હીંચકા પર આરામથી બેસીને આરટીઆઇના દબાણ વિશે વાત કરતા જોવા મળે છે. આ વીડિયોમાં તે વસૂલી વિશે વાત કરી રહ્યા હોવાનું જાણવા મળ્યું છે.એસઓજી પોલીસે પૂર્વ કાઉન્સિલર સામે કાયદેસરની કાર્યવાહી શરૂ કરી છે.
સુરત એસઓજી ટીમ ભૂતપૂર્વ કાઉન્સિલરની ધરપકડ કરવા માટે પ્રકાશ દેસાઈના ઘરની છત પર હતી. પ્રકાશ દેસાઈને આ વાતની ખબર નહોતી. જ્યારે પ્રકાશ દેસાઈએ ખંડણીના પૈસા લીધા ત્યારે ફરિયાદીના કહેવાથી એસઓજી પોલીસકર્મી પોતાનો જીવ જોખમમાં મૂકીને છત પરથી નીચે ઉતરી આરોપીના ઘરની બાલ્કનીમાં પહોંચી ગયા હતા. આ દ્રશ્ય કોઈ ફિલ્મનું હોય એવું લાગતું હતું. આ દરમિયાન એસઓજી ડીસીપી રાજદીપ સિંહ નકુમ અને પીઆઇ સહિત પોલીસકર્મીઓ પ્રકાશ દેસાઈની ધરપકડ કરવા માટે તેમના ઘરની નીચે હાજર હતા. પોલીસકર્મી છત પરથી પ્રકાશ દેસાઈના ઘરમાં પ્રવેશી અને બીજી તરફ એસઓજી ટીમ પણ ઘરની નીચે પહોંચી હીંચકા પર બેઠેલા પ્રકાશ દેસાઈની ધરપકડ કરી હતી.
