સીટી એ ડિવિઝન પીઆઈ નિકુંજ ચાવડા વિરુદ્ધ સિવિલ મામલામાં ફોજદારી કેસ દાખલ કર્યાનું ટાંકી કોર્ટએ ડિસિપ્લિનરી તપાસ કરવા આદેશ આપ્યા’તા
Jamnagar,તા.30
જામનગર શહેર પોલીસમાં ફરજ બજાવતા પીઆઈ ચાવડા દ્વારા હાઇકોર્ટમાં દાદ માંગવામાં આવી છે. સેશન્સ કોર્ટ દ્વારા પીઆઈ ચાવડા વિરુદ્ધ ડિસિપ્લિનરી ઈન્કવાયરીના આદેશ આપવામાં આવ્યા હતા જેની સામે તેમણે હાઇકોર્ટમાં આદેશને રદ્દ કરવા અપીલ કરી છે. ઉલ્લેખનીય છે કે, રૂ. 21.91 લાખની ઠગાઈ મામલે આ આદેશ જાહેર કરવામાં આવ્યો હતો.
કેસની વિગતો પર નજર કરવામાં આવે તો પોલીસ ઇન્સ્પેક્ટર એન. એ. ચાવડાએ 9 એપ્રિલના રોજ જામનગરના એડિશનલ સેશન્સ જજ આર. વી. મંડાણી દ્વારા આપવામાં આવેલા આદેશને રદ કરવા માટે અરજી દાખલ કરી હતી. આ આદેશ મંજુ પાંડેને આગોતરા જામીન આપતી વખતે જારી કરવામાં આવ્યો હતો. જેમના કેસની તપાસ પીઆઈ ચાવડા દ્વારા કરવામાં આવી રહી હતી. કોર્ટે પોલીસ અધિક્ષકને ફોજદારી કલમો હેઠળ પગલાં લેવા બદલ પીઆઈ સામે ડિસિપ્લિનરી ઈન્કવાયરી શરૂ કરવાનો આદેશ આપ્યો હતો.
જેની સામે પીઆઈએ વકીલ ઉત્કર્ષ દવે દ્વારા હાઇકોર્ટ સમક્ષ દાખલ કરાયેલી અરજીમાં, ચાવડાએ સેશન્સ કોર્ટના આદેશને રદ કરવાની વિનંતી કરી હતી. અરજીમાં દલીલ કરવામાં આવી છે કે આગોતરા જામીન અરજીનો નિર્ણય લેતી વખતે કોર્ટની સત્તાનો અવકાશ અરજદારને મુક્ત કરવા સુધી મર્યાદિત છે. વિદ્વાન કોર્ટ બીએનએસઝની કલમ 482 ની જોગવાઈઓમાંથી બહાર નીકળી શકે નહીં અને બીએનએસએસ કલમ હેઠળ નિર્ધારિત ન હોય તેવા નિર્દેશો જારી કરી શકે નહીં.
અરજીમાં વધુમાં દલીલ કરવામાં આવી છે કે તે સારી રીતે નક્કી થયું છે કે જો અધિકારી તરફથી કોઈ ભૂલ હોય તો પણ કોર્ટ ફક્ત તે હકીકતો શિસ્ત અધિકારી સમક્ષ વિચારણા માટે રજૂ કરી શકે છે. તે શિસ્ત અધિકારીને ભૂલ કરનાર અધિકારી સામે કાર્યવાહી શરૂ કરવા અથવા શિસ્ત અધિકારીની ભૂમિકા ભજવી શકે નહિ.
વધુમાં, અરજીમાં જણાવાયું છે કે જોકે આ કેસમાં તપાસ પૂર્ણ થઈ નથી અને કોઈ ચાર્જશીટ દાખલ કરવામાં આવી નથી. કોર્ટે એક મીની ટ્રાયલ હાથ ધરી છે અને વાંધાજનક આદેશ પસાર કરવા માટે પુરાવાના અસ્તિત્વને ધારી લીધું છે જે કાયદામાં આ માન્ય નથી તેવી દલીલો કરવામાં આવી છે.
