New Delhi,તા.૨૦
પંજાબના ભૂતપૂર્વ મુખ્યમંત્રી બિઅંત સિંહની હત્યાના દોષિત બલવંત સિંહ રાજોઆનાની ફાંસીની સજાને આજીવન કેદમાં રૂપાંતરિત કરવાની માંગ પર નિર્ણય લેવા માટે સુપ્રીમ કોર્ટે કેન્દ્ર સરકારને ૧૮ માર્ચ સુધીનો સમય આપ્યો છે. કોર્ટે કહ્યું કે કેન્દ્ર સરકારને આપવામાં આવેલી આ છેલ્લી તક છે. જો કેન્દ્ર સરકાર આ મામલે નિર્ણય લેવામાં અસમર્થ રહે છે, તો કોર્ટ યોગ્યતાના આધારે સુનાવણી શરૂ કરશે.
આ કેસમાં કેન્દ્ર સરકાર વતી સોલિસિટર જનરલ તુષાર મહેતાએ કહ્યું કે આ એક મુખ્યમંત્રી સહિત ૧૬ લોકોની હત્યાનો કેસ છે, સરકાર હજુ પણ આ મુદ્દા પર વિચાર કરી રહી છે. છેલ્લી સુનાવણીમાં પણ સુપ્રીમ કોર્ટે ગૃહ મંત્રાલયને રાજોઆનાની દયા અરજી પર ઝડપી નિર્ણય લેવા કહ્યું હતું.
બળવંત સિંહ રાજોઆના લગભગ ૨૭ વર્ષથી જેલમાં છે અને તેમની દયા અરજી ૧૨ વર્ષથી કેન્દ્ર સરકાર પાસે પેન્ડિંગ છે. સુનાવણી દરમિયાન, રાજોઆના વતી દલીલ કરવામાં આવી હતી કે મુખ્ય પ્રધાનનું મૃત્યુ બોમ્બ વિસ્ફોટમાં થયું હતું અને આ કેસમાં જુલાઈ ૨૦૦૭ માં મૃત્યુદંડની સજા ફટકારવામાં આવી હતી. ૨૦૧૦માં હાઈકોર્ટે સજાને સમર્થન આપ્યું હતું. તે ૨૭ વર્ષથી જેલમાં છે. દયા અરજી ૨૦૧૨ થી પેન્ડિંગ છે.
રાજોઆના વતી હાજર રહેલા એડવોકેટ મુકુલ રોહતગીએ રજૂઆત કરી હતી કે મૃત્યુદંડની સજાના અમલમાં લાંબો વિલંબ મૂળભૂત અધિકારોનું ઉલ્લંઘન છે. તેમણે એવી પણ માંગ કરી હતી કે દયા અરજી પર નિર્ણય ન આવે ત્યાં સુધી તેમને પેરોલ પર મુક્ત કરવામાં આવે.
